М.К.Попова аатынан Майатааҕы оҕо уксуустубатын оскуолатын хореографияҕа салаатын иитиллээччилэрэ – Айсаана Гаврильева, Нина Шестакова, Арианна Новгородова уонна Роза Сивцева (учууталлара СӨ култууратын туйгуна Майя Ноева,) күһүҥҥү сынньалаҥнарын Аксенья уонна Наталья Посельскайдар ааттарынан балет оскуолатын иһинэн үлэлиир «Арабеск» устуудьуйаҕа атаардылар.
Алтынньы 28 күнүттэн сэтинньи 2 күнүгэр диэри балет кэрэ эйгэтигэр айар оскуола үлэлээтэ. Кыргыттар колледж уопсай дьиэтигэр олорон үөрэннилэр.
Иллэҥ кэмнэригэр араас түмэллэри, быыстапкалары, испэктээктэри көрдүлэр-иһиттилэр. Кыргыттар балет эйгэтигэр киэҥ билиини ылан, сынньалаҥнарын туһалаахтык атаардылар.
Айар оскуола түмүктүүр тэрээһинигэр үөрэнээччилэр кылаас-кэнсиэрдэрэ ыытылынна уонна хас биирдии үөрэнээччигэ «Арабеск» балет устуудьуйатын ситиһиилээхтик бүтэрбиттэрин туоһулуур тус сэртипикээттэри туттардылар.
Кыргыттарга ситиһиилэри, бэйэҕэ эрэллээх буолууну, бары үтүөнү баҕарабыт.
Прасковья Назарова,
М.К.Попова аатынан Майатааҕы оҕо ускуустубатын оскуолатын тэрийээччи бибилэтиэкэрэ.
