Владвосток куоракка алтынньы бүтэһик күннэригэр Уһук Илин хуордарын II олимпиадата уонна Хуордар бүтүн Арассыыйатааҕы бэстибээллэрэ ытылынна.
Бу улахан түһүлгэҕэ 16 эригийиэнтэн 110 айар кэлэктиип, 2500 киһи кыттыбытыттан Саха сирин кэлэктииптэрэ үһүөн ситиһиилээхтик кытыннылар. Ол курдук, Уһук Илин хуордарын II олимпиадатыгар «Холбоһуктаах хуордар» анал аакка Уус Алдан улууһун С.Г.Васильев аатынан Найахытааҕы норуодунай хуор (салайааччы Афанасий Новоприезжай) боруонса мэтээлгэ тигистэ, Мэҥэ Хаҥаластан Н.Н.Васильева аатынан Майатааҕы (Саргылаана Павлова) уонна Төҥүлүтээҕи (Галина Варламова) норуодунай хуордар дипломунан, «Норуот муусуката» анал аакка Төҥүлүтээҕи норуодунай хуор кэлэктиибэ боруонса мэтээлинэн наҕараадаланнылар.
Хуордар бүтүн Арассыыйатааҕы бэстибээллэригэр Найахытааҕы С.Г.Васильев аатынан норуодунай хуор 3-с истиэпэннээх лауреат аатын ылла. Н.Н.Васильева аатынан Майатааҕы (Саргылаана Павлова) уонна Төҥүлүтээҕи (Галина Варламова) норуодунай хуордар толоруулара дипломунан бэлиэтэннилэр.
Айар кэлэктииптэрбитин эҕэрдэлиибит уонна өссө үрдүк ситиһиилэри баҕарабыт.
