Уһуйааччы уонна утумнааччылар уопуттарын билистибит

Кулун тутар 19-20-21 күннэригэр Таатта улууһун Баайаҕа нэһилиэгэр үлэ, уруһуй уонна эбии үөрэхтээһин учууталларыгар өрөспүүбүлүкэтээҕи куурус буолан ааста.  

Кууруска барыта араас улуустан 45 учуутал кэлэн үөрэннэ: Бүлүүттэн, Томпоттон, Уус Алдантан, Чурапчыттан, Мэҥэ Хаҥаластан, Намтан уонна Дьокуускай куораттан биир идэлээхтэрбит кэлбиттэр. Биһиги Баатара орто оскуолатыттан икки буолан кыттыыны ыллыбыт.

Сэминээр үөрүүлээх чааһа Борис Федорович Неустроев–Мандар Уус алгыһыттан саҕаланна. Тимир ууһа, ойууһут, бөлүһүөк, Саха Өрөспүүбүлүкэтин норуотун маастара Мандар Уус түмэлигэр, туостан тигиллибит Моҕол ураһатыгар экскурсия тэрилиннэ. Иккис күҥҥэ сарсыардаттан үөрэхпит саҕаланна. Үөрэнээччилэр быыстапкалара турда. Кууруска хардары-таары үлэбит уопутун атастастыбыт. Баайаҕа маастардара бэйэлэрин талааннарын, үлэлэрин кистэлэҥин арыйан, туһалаах маастар кылаастары ыыппыттара. Ол курдук, Парасковья Макарова туоска, Галина Неустроева иҥииринэн сабы хатыы, Елена Иннокентьева, Лилия Игнатьева таҥаска хайа быһан кыбытан тигии технологиятын көрдөрдүлэр.

Түмүктүүр күҥҥэ оҕолорго уонна учуутталларга өрөспүүбүлүкэтээҕи «Мандар Уус ааҕыылара» научнай-чинчийэр кэмпириэнсийэ ыытыллыбыта. Тэрээһин “Уһуйааччы уонна утумнааччылар”, “Мандар Уус бөлүһүөктүү көрүүлэрэ”, ”Айар үлэ түһүлгэтэ” диэн хайысхаларынан ыытылынна. Биһиги оскуолабытыттан “Оҕону кэрэҕэ-үтүөҕэ уһуйуу уратылара” тиэмэнэн Раиса Иннокентьевна Романова кыттан иккис истиэпэннээх дипломант аатын ылары ситистэ.

Үөрэх үлэһиттэрин идэлэрин таһымын үрдэтэр институт мэтэдьиистэригэр Елизавета Петровна Дудкинаҕа, Юрий Викторович Копыриҥҥа итиэннэ Степан Петрович Старостин салайааччылаах Баайаҕа орто оскуолатын кэлэктиибигэр үрдүк таһымнаах кууруһу тэрийэн ыыппыттарыгар махталбытын биллэрэбит.

Киэҥ билиилээх, баай уопуттаах биир идэлээхтэрбитин кытта билсэн үлэлиэх, айыах-тутуох санаабыт күүһүрдэ!

 

Вера Неустроева,

Баатара орто оскуолатын учуутала.