Мэҥэ Хаҥалас улууһун уонна Майа сэлиэнньэтин дьаһалталарын өйөбүллэринэн Майатааҕы Мария Лукина салайааччылаах “Түмэн” уопсастыбаннай холбоһук анал байыаннай дьайыы саҕаланыаҕыттан байыастарга анаан элбэх көрүҥ көмөнү оҥорон кэллэ. Түмэннэр өрөспүүбүлүкэтээҕи “Саха сирэ эйигинниин” уонна “Илии сылааһа” ыстааптары кытта ситимнээхтик үлэлииллэр. Манна “Эйэлээх олох кэлэрин туһугар туруулаһа сылдьар биир дойдулаахтарбытыгар илиибит сылааһын ыытан күүс-көмө буолабыт” диэн санааттан олохтоох нэһилиэнньэ көхтөөхтүк кыттар.
Бу күннэргэ түмэннэр “Саха сирэ эйигинниин” ыстаапка уочараттаах көмөлөрүн киллэрэн туттарбыттара. Онно 2 куул хаххаланар сиэккэ, 153 устуука блиндажнай чүмэчи, 8 паара көстүүм, 12 устуука ыстаан, 6 устуука кааска үрдүнэн кэтиллэр харысхал сиэккэ оҥоһуллан бардылар. Ону таһынан Майатааҕы иитэр-үөрэтэр киин үлэһиттэрэ Марфа Никитина уонна Надежда Петрова байыастар малларын уктан сылдьалларыгар анаан 30 устуука үрүксээги итиэннэ госпиталга сытааччыларга сүнньүлэригэр, атахтарыгар ууралларыгар анаан тирииттэн тигэн 10 устуука валиктары, Мичийээнэ, Анна Аргуновалар эмтээх уонна ыраастанар от арааһын, битэмииннээх чэйдэри бэлэмнээн биэрбиттэрин госпиталларга анаан ыыттылар.
Хаххаланар сиэккэни өрүүгэ “Исаев”, “Ураһалаах”, “Академик”, “Сайдыы” түөлбэлэртэн көхтөөх дьон, Майатааҕы В.П.Ларионов аатынан орто оскуолаттан Саргылана Дмитриева салайааччылаах 7-с “б” кылаас оҕолоро, Ф.Г.Охлопков аатынан орто оскуолаттан Анна Васильева салайааччылаах 10-с “б” кылаас оҕолоро итиэннэ төрөппүттэр кэлэн көмөлөстүлэр диэн харысхал сиэккэни өрөр түмсүү салайааччыта Евдокия Семенова махтанар. Кааска үрдүнэн кэтиллэр харысхал сиэккэ оҥоһуутугар Тиэлигиттэн тиийэ дьиэҕэ олорор иистэнньэҥнэр көмөлөһөн үлэлээтилэр. Майаттан уопсастыбанньык Заредина Сосина 20 устууканы оҥорбута. Онон саҥа сылга киирэн баран уопсайа 36 устуука кааска үрдүнэн кэтиллэр харысхал сиэккэ оҥоһуллан барда.
“Илии сылааһа” ыстаапка Ариадна Филиппова саҥа сылга үктэнэн баран бастакы сырыыга 3 сылаас көстүүм, 2 хлопок көстүүм, кэлиҥҥи барыыга 4 көстүүм, 1 халыҥ көстүүм, 1 флисовай хаһыаччык, 3 плащевай ыстаан тигэн ыытта. Бу таҥастары кытта харысхал, чүмэчи ыытылынна. Түмэннэр бу күннэргэ анал байыаннай дьайыыга сулууспалыы баран иһэр 4 оҕону толору кэмпилиэгинэн таҥыннаран ыыттылар.
Байыастарга анаммыт малы-салы “Түмэн” уопсастыбаннай холбоһук сүбэтин чилиэнэ, “Парус” успуорт киинин тириэньэрэ Темир Сыдыкбеков Дьокуускай куоракка илдьэн “Саха сирэ эйиигинниин” уонна “Илии сылааһа” ыстааптарга туттарар. Онон түмэннэр көмөлөрүн ыыталларыгар маннык өйөбүллээх буолан кыһалҕаны көрсүбэттэригэр Темир Абдыкалыевичка махталлара улахан.
Ити курдук, дойду көмүскэлигэр сулууспалыыр биир дойдулаахтарбыт ытык иэстэрин сиэрдээхтик толорон этэҥҥэ дойдуларыгар эргиллэн кэлэллэригэр түмэннэр көмөлөрө уҕараабат.
Марелла Баишева.
