Атырдьах ыйын 11 күнүгэр Мэҥэ Хаҥалас улууһун дьаһалтатыттан байыаннай дьайыыга кытта сылдьар биир дойдулаахтарбытыгар гуманитарнай көмөнү илдьэ бэрэстэбиитэллэр барбыттара. Кинилэргэ Мария Лукина салайааччылаах Майатааҕы “Түмэн” уопсастыбаннай холбоһук көмөлөстө.
«Түмэннэри” өйөөн улуус дьаһалтата 24000, Майа сэлиэнньэтин дьаһалтата 50000, “Кэскил” түөлбэ 2700, “Лесопуун” 12500, “Көмүс кэм” түмсүү 3000, оскуоланы 1983 с. бүтэрбиттэр 6000, “Сэрии сылын оҕолоро” түмсүү 5000 солк. харчынан көмөлөстүлэр. Бу үбүнэн таҥас-сап, харысхал тигилиннэ: 27 көстүүм (ыстаан, куурка), 33 ис таҥас, 5 хлопок ыстаан, 39 флисовай баккы, 22 футболка, 6 ардахха кэтиллэр кэмпилиэк, 44 флисовай куллука, 58 илиигэ, атахха баанар бэлиэлэр, 130 саа уоһун сабыыта, панама, бейсболка, ону сэргэ, 263 харысхал оҥоһуллан ыытылынна. “Кыталык” кииҥҥэ Евдокия Семенова салайааччылаах уопсастыбанньыктар түмсэн үлэлээннэр 56 м саһыарар сиэккэни баайан ыыттылар. Маны сэргэ, 268 хатарыллыбыт балык миинэ, 150 соркуойдаммыт балык барда. Манна Лоомтукаттан Николай Игнатьев, Сыымахтан Иннокентий Неустроев балык аҕалан көмөлөстүлэр. Балыгы соркуойдааһыҥҥа Маргарита Максимова, Антонина Петрова, Татьяна Лукина үлэлээтилэр. “Эркээйи” хаһыат эрэдээксийэтэ улуустарын сонунун билэ сылдьалларыгар хаһыаттары, “Айар” кинигэ кыһатын уопсастыбаннай атыыһыта Егор Белолюбскай кинигэлэри биэрэн кыттыстылар.
“Дьол түһүлгэтэ” уопсастыбаннай кииҥҥэ Федора Наумова салайааччылаах сыах иистэнэн, Татьяна Попова салайааччылаах түмсүү харысхал оҥорон, Екатерина Романова салайааччылаах “Кэнчээри” уһуйаан үлэһиттэрэ собо балыгы хатаран баран мээккэлээн, Маргарита Максимова салайааччылаах бэтэрээннэр, Валерия Дмитриева салайааччылаах психологическай киин лааҕырын оҕолоро хатарыллыбыт балык бакыатын оҥорон, Майатааҕы үөрэтэр-үлэлиир киин үлэһиттэрэ сиэккэҕэ матырыйаалынан көмөлөстүлэр.
Тиһигин быспакка күннэтэ үлэ оҥостон көхтөөхтүк кыттыбыт дьону ааттыыр буоллахха, Ариадна Филиппова, Заредина Сосина, Валентина Аманатова, Лидия Андреева, Парасковья Чичахова, Антонина Петрова, Марианна Афанасьева, Марта Никанорова, Полина Осипова, Бөкөттөн Варвара Васильева, Лоомтукаттан Мария Прокопьева, “Кэнчээри” уһуйаантан Капиталина Семенова, Александра Афанасьева, Октябрина Ефремова, Вера Охлопкова буолаллар. Кинилэри сэргэ, биирдиилээн дьон хайдах быыстаахтарынан көрөн субуотунньукка кытыннылар.
”Түмэн” уопсастыбаннай холбоһук салайааччыта Мария Лукина үтүө санаанан кэлэн көмөлөспүт бар дьонугар ис сүрэҕиттэн махтанар.
Байыаннай дьайыыга сылдьар биир дойдулаахтарбытыгар этэҥҥэ кыайыы көтөллөөх кэлэллэригэр баҕарабыт.
Марелла Баишева.
