Майатааҕы “Түмэн” уопсастыбаннай холбоһук “Дьол түһүлгэтэ” кииҥҥэ ахсынньы 18 күнүгэр Саҥа дьылы көрсө аан бастакытын “Ассорти” сүүйүүлээх лотереяны оонньотто. Манна дьон-сэргэ көхтөөхтүк кыттыбытын бэлиэтиир тоҕоостоох. Түмэннэр лотерея оонньуутун анал байыаннай дьайыыга сылдьар байыастарга көмөлөһөр сыаллаах уопсастыбаннаска тирэҕирэн тэрийдилэр.
Лотерея оонньуутугар успуонсардаабыт тэрилтэлэрбитинэн олохтоох дьаһалта (баһылык Алексей Неустроев), Ил Түмэн дьокутааттара Олег Марков, Тихон Скрябин, култуура уонна духуобунай сайдыы управлениета (начаалынньык Анна Исакова), Ю.А.Гагарин аатынан типография (дириэктэр Владимир Сыромятников), Аллараа Бэстээхтээҕи “Парус” успуорт киинэ (дириэктэр Дьулустан Захаров), “Эркээйи” эрэдээксийэтэ (дириэктэр-эрэдээктэр Алена Докторова), “Кэнчээри” оҕону сайыннарар киин (дириэктэр Екатерина Романова), М.К.Попова аатынан муусука оскуолата (Василий Захаров), “Сэрии сылын оҕолоро” түмсүү (сал.солбуйааччыта Мария Сергеева), “Майа бочуоттаахтара” түмсүү (сал.Елизавета Семенова), “Чүүйэ” МУТ (сал. Аркадий Лукин), “Талер” маҕаһыын (сал. Дмитрий Катакинов), “Түһүлгэ” (сал. Евдокия Семенова), “Эркээйи” волонтердара” (староста Акулина Устинова) итиэннэ “Түмэн” түмсүүлэрин чилиэннэрэ бэйэлэрин бириистэрин туруордулар.
Күүтүүлээх дьоро күн тэрээһинин “Түмэн” уопсастыбаннай холбоһук чилиэннэрэ бэйэлэрэ иилээн-саҕалаан үрдүк таһымнаахтык ыыттылар. Ааҕар-суоттуур хамыыһыйаҕа “Түмэн” бэрэссэдээтэлэ Мария Лукина, улуустааҕы Ытык Сүбэ бэрэссэдээтэлэ Зиновий Игнатьев, олохтоох дьаһалта түөлбэлэри кытта үлэлиир исписэлииһэ Жанна Тумусова, Майатааҕы Ытык сүбэ бэрэссэдээтэлэ Михаил Егоров үлэлээтилэр. Норуот тапталлаах ырыаһыта Степан Копырин ыытааччынан, Олег Федоров муусуканан киэргэтиигэ, Федор, Екатерина Баишевтар уонна Антонина Петрова лотерея хаамыыта сыыһата-халтыта уонна харгыһа суох тэтимнээхтик барарыгар үлэлээтилэр.
Сүүйүүлээх оонньууга Николай Попов, Розалия Терентьева “Үрдэл” гала-кэнсиэргэ билиэттэри, Светлана Маркова сурунаал остуолун, Төҥүлүттэн Ирина Борисова, о.д.а. “Парус” успуорт киинин, Светлана Лыткина, о.д.а. “Эркээйи” сыллааҕы сурутуутун, Аркадий Пугачев “Учур” булт маҕаһыынын Туоһу суруктарын сүүйдүлэр. Дмитрий Титовтан кууллаах хортуоппуйу Федот Алексеев, Федор, Екатерина Баишевтартан уонна Анна Павловаттан, Светлана Константиноваттан кууллаах тоҥ соболору Мария Шипошина, Хаарчаана Иванова, урбаанньыт Татьяна Михайлова тортарын Нина Крылова, Люция Кондакова, Марелла Баишева туруорбут 10 киилэ ынах арыытын В.П.Ларионов аатынан орто оскуола 5 “а” кылааһын үөрэнээччитэ Саян Барабанов, Федора Наумова туруорбут гамак хачыалын Татьяна Скрябина талааннаах тарбахтарынан тардан ыллылар. Маны сэргэ, кустар, барыанньалар, миискэлэр нобуордара, улахан сибиинньэ аҥаара эттэнэн, микроволновка, мультиварка, пароварка, пылесостар, электрическай хобордоох, чаанньыктар, ас-үөл нобуора, дьиэ мала-сала, парикмахер өҥөтө, үрүҥ көмүс оҥоһуктар, бриллиант, онтон да атын – барыта 302 билиэттэн 163 сүүйүү оонньоннулар. Супер бириискэ оонньоммут убаһа аҥаарын хаһаайыннарынан Анастасия Константинова, Мария Лукина буоллулар.
Түмэннэр Саҥа дьылы көрсө дьону-сэргэни үөрдээри тэрийбит “Ассорти” лотереялара сыалын-соругун ситтэ. Тэрээһин кыттыылаахтара ис сүрэхтэриттэн үөрэн-астынан, тэрийээччилэргэ махтанан тарҕастылар. Түгэнинэн туһанан, бары успуонсардарбытыгар “Түмэн” холбоһук сүбэтэ улахан махталын тириэрдэр.
Марелла Баишева.
