Түөлбэбит чэлгийиэ, тулабыт киэркэйиэ

Сылын аайы өрөспүүбүлүкэҕэ, улууска биллэриллэр ыраастаныы, хомунуу ыйын чэрчитинэн Догдоҥо нэһилиэгэр олохтоох дьаһалта баһылыгын Петр Сивцев дьаһала тахсан, нэһилиэкпитигэр субуотунньугунан үлэлэр күөстүү оргуйдулар.

Ол курдук ыам ыйын 6 күнүгэр олохтоох дьаһалта, оскуола аттынааҕы сиргэ-уокка ыраастаныы үлэлэр ыытылыннылар. Ыам ыйын 7 күнүгэр «Союз» кэпэрэтиипкэ 48 сүөһү бэчээттэнэн, атыыр сүөһүлэр аттанан, биир улахан үлэ үмүрүйдэ. Барыта бу үлэҕэ 12 киһи кыттыыны ылла. Бу күн Кыайыы пааматынньыгар, Ийэ искибиэригэр олохтоох дьаһалта, култуура үлэһиттэрэ, оскуола 5-8 кылааһын үөрэнээччилэрэ, учууталлара, «Туллукчаан» уһуйаан кэлэктиибэ бары үлэлиир тэрилтэлэринэн субуотунньуктаатылар. Ыам ыйын 8 күнүгэр ОДьКХ үлэһиттэрэ сыстыбыт сирдэригэр-уоттарыгар, Майа өттүттэн Догдоҥо кыраныыссатыгар диэри сыыһы, бөҕү-саҕы хомуйдулар. Оскуолабыт кэллэктиибэ Бөкөттөн Анабы алааска диэри ыраастаныы үлэтин ыытта. Ону тэҥэ «Алгыс» түөлбэ олохтоохторо, сүөһүлээх ыаллар дүөдэ аттынааҕы сири-уоту ыраастаатылар.

Бу курдук нэһилиэкпит иһигэр көхтөөхтүк ыраастаныы, хомунуу үлэлэрэ ыытылыннылар.

 

Светлана Иванова,

Догдоҥо.