Улууспутугар эдэр исписэлиистэргэ үлэлииллэригэр, олороллоругар табыгастаах усулуобуйа, эйгэ тэриллэр. Ол да иһин дьон-сэргэ Мэҥэ Хаҥалаһы иккис дойду оҥостон сөбүлээн олохсуйар.
—
Бүгүн Майа сэлиэнньэтигэр дьон-сэргэ бигэ туруктаах, доруобай, нэһилиэк кэскилэ бөҕөргүүрүн туһугар үлэлии-хамсыы кэлбит үрүҥ халааттаах эдэр үлэһиттэргэ толору хааччыллыылаах саҥа таас дьиэҕэ кыбартыыра күлүүһүн туттарар биир умнуллубат, долгутуулаах бэлиэ тэрээһин ыытылынна.
Сылаас, сырдык, саҥа кыбартыыра күлүүстэрин үөрүүлээх быһыыга улуус баһылыга Дмитрий Тихонов туттарда.
Дмитрий Иванович эҕэрдэ тылыгар СӨ Ил Дархана Айсен Николаев тыа сиригэр эдэр дьон олохсуйуутугар “Эдэр үлэһиттэри дьиэнэн хааччыйыы” бырагыраамата бэрт үчүгэй хамсааһынан буоларын бэлиэтээтэ.
-«Мэҥэ-тутуу» производственнай кэпэрэтиип туппут элбэх кыбартыыралаах толору хааччыллыылаах дьиэтигэр сэттэ кыбартыыраны улууспутугар ордук доруобуйа харыстабылын үлэһиттэрэ тиийбэттэринэн кинилэргэ аныырга быһаарыы ылыммыппыт, — диэн баһылык эттэ.
Саҥа дьиэ күлүүһүн быраастар онколог Ириана Васильева, эпидемиологтар Пелагея Федорова, Мария Бурнашева, стоматологтар Георгий Романов, Ольга Куприянова туттулар.
Эдэр быраастары киин балыыһа кылаабынай бырааһа Алексей Павлов, «Майа сэлиэнньэтэ» тыа сирин түөлбэтин баһылыгын солбуйааччы Дмитрий Игнатьев истиҥник эҕэрдэлээтилэр, кинилэргэ таһаарыылаах үлэни баҕардылар.
Доруобуйа харыстабылын бэтэрээннэрин ааттарыттан саҥа үлэлии кэлбит быраастарга баҕа санаатын, үтүө алгыһын офтальмолог, СӨ үтүөлээх бырааһа, Майа сэлиэнньэтин Бочуоттаах гражданина Антонина Никитина тиэртэ.
— Эһиги дьоллоох дьоҥҥут, биһиги 50-ча сыл анараа өртүгэр үлэлиирбитигэр дьиэ-уот диэн суох этэ. Билиҥҥи курдук үрдүк технологиялаах аппаратура суоҕа. Эдэр дьон ыарыһахтарга эйэҕэс сыһыаннаах буолуҥ. Саҥа ылбыт кыбартыыраларгытын, ис сүрэхтэн таптааҥ, ыраастык тутан, көрөн-харайан олоруҥ” — диэтэ Антонина Егоровна.
Саҥа үлэлии кэлбит быраастар ааттарыттан харда тылы эпидемиолог быраас Пелагея Федорова эттэ. Кини улуус баһылыгар Дмитрий Тихоновка, киин балыыһа кылаабынай бырааһыгар Алексей Павловка олорор усулуобуйаларын тэрийбиттэригэр махтанна.
Салгыы эдэр үлэһиттэр дьиэлэрин тахсан көрдүбүт. Үлэлиир сирдэриттэн чугас турар, бэйэлэригэр сөрү-сөп кээмэйдээх, толору хааччыллыылаах кыбартыыралары көрөн астынныбыт. Кыбартыыралар ирдэбил быһыытынан чааһынай бас билиигэ барбат. Саҥа үөрэҕи бүтэрэн үлэлии кэлбит эдэр исписэлиистэр олороллоругар туһаныллар.
Маннык бырагыраама тыа сиригэр үлэлиирэ хайҕаллаах. Эдэр исписэлиистэр тыа сиригэр олохсуйалларыгар табыгастаах усулуобуйа тэриллэн үлэлэрэ таһаарыылаах, көдьүүстээх буоларыгар төрүөт буолара саарбаҕа суох.
Елизавета Неустроева.
