“Кыталык” үҥкүү норуодунай ансаамбыла тэриллибитэ 45 сылыгар анаммыт өрөспүүбүлүкэтээҕи спортивнай-бальнай турнир уонна өрөспүүбүлүкэтээҕи отечественнай-бальнай үҥкүүнү толорооччулар икки ардыларыгар бэстибээл-куонкурус ахсынньы 22 күнүгэр Аллараа Бэстээх бөһүөлэгин “Парус” уораҕайыгар ыытылынна.
Тэрээһиҥҥэ Дьокуускай куораттан, Амма, Нам, Горнай, Хаҥалас, Таатта, Бүлүү, Уус Алдан уонна Мэҥэ Хаҥалас улуустарыттан 30-тан тахса үҥкүү кулууптара кыттыыны ыллылар. Быйылгы үбүлүөйдээх сылбытыгар хаһааҥҥытааҕар да элбэх – уопсайа 516 кыттааччы кэлэн тэрийээччилэри үөртэ!
Үөрүүлээх тэрээһиммитигэр Мэҥэ Хаҥалас улууһун баһылыга Дмитрий Тихонов, “Кыталык” ансаамбыл көмүс састаабын выпускниктара – Саха Өрөспүүбүлүкэтигэр художественнай гимнастика федерациятын бэрэсидьиэнэ Людмила Николаева, «Саха» национальнай көрдөрөр-иһитиннэрэр хампаанньа суруналыыһа Катерина Григорьева, Аллараа Бэстээх бөһүөлэгин баһылыга Юрий Колмаков, Мэҥэ Хаҥалас улууһун култуураҕа уонна духуобунай сайдыыга управлениетын салайааччыта Анна Исакова ыалдьыттаатылар.
Күрэх үөрүүлээх аһыллыытыгар ыалдьыттарбыт эҕэрдэ тылларын, истиҥ баҕа санааларын эттилэр, “Кыталык” ансаамбыл үгүс суолталаах үлэтин сыаналаатылар. , Юрий Колмаков үөрүүлээх быһыыга-майгыга Василий Павловичка Винокуровка “Үгүс сыллаах сыралаах үлэтин, Аллараа Бэстээххэ үҥкүү ускуустубата сайдыытыгар кылаатын иһин” харыга кэтиллэр чаһыылаах грамотатын, “Кыталык” оҕо-ыччат эстетическэй киинин дириэктэригэр Сардана Терентьеваҕа “Аллараа Бэстээх бөһүөлэгин култууратын эйгэтигэр кылаатын иһин”, Дмитрий Тихонов Майя Ноеваҕа “Саха Өрөспүүбүлүкэтигэр норуот уус-уран айымньытын сайдыытыгар кылаатын иһин” бочуоттаах бэлиэлэри туттардылар.
Спортивнай-бальнай үҥкүү турнирыгар 6 үҥкүү кулууба 12 бөлөҕүнэн, отечественнай-бальнай үҥкүүнү толорооччулар бэстибээл-куонкурустарыгар 25 кулууп 29 бөлөҕүнэн хайдан кытыннылар. Бу үҥкүү салаалара Саха сиригэр, улууспутугар тэтимнээхтик сайдан иһэллэрин бэлиэтиир.
Турнир кылаабынай судьуйатынан Саха Өрөспүүбүлүкэтин култууратын үтүөлээх үлэһитэ, үөрэҕирии туйгуна, Саха сиринээҕи Үҥкүү успуордун федерациятын бэрэсидьиэнэ Михаил Сивцев үлэлээтэ, Российскай Федерация үҥкүү успуордугар I-гы категориялаах судьуйата, “Санрайз” үҥкүү кулуубун салайааччыта Юрий Алексеев иилээн-саҕалаан ыытта.
Кыайыылаахтар дипломунан, мэтээлинэн наҕараадаланан, кыттааччылар үөрүүлэрэ үрдээн, аныгыс күрэхтэргэ көрсүөххэ диэри дэһэн астынан тарҕастылар.
Үҥкүүнэн утумнаахтык дьарыктаныҥ, биһиги ансаамбылбыт куруутун баҕалаахтары күүтэр, ыҥырар!
Светлана Никитина,
«Кыталык» оҕо-ыччат эстетическэй киинин фольклорга исписэлииһэ.
