Тумулга сайылык пиэрмэтин түптэ күөх буруота унаарар…

«Тумул» тыа хаһаайыстыбатын производственнай кэпэрэтиибин «Эбэ түгэҕэ», «Дьаам», «Хомус» сайылыктарыгар быйыл сайын 600-тэн тахса ынах сүөһүнү көрөллөр-истэллэр.

Икки ыанньык сайылыкка 200-тэн тахса ыанар ынах баар. 10 ыанньыксыт сайыҥҥы кэмҥэ биирдии ынахтан 1300 киилэ үүтү ыырга эбэһээтилистибэ ылыммыттара.

Ньирэй көрөр сайылыкка ыччат сүөһүнү, субаны төлөһүтүүгэ 3 көрөөччү биирдии төбөнү 90-100 киилэҕэ диэри улаатыннарар соруктаах үлэлии-хамсыы сылдьаллар.

«Эбэ түгэҕэ» сайылыкка 9 ыал көһөн кэлбитэ. 110 ынах төрөөн, бары ыаналлар. Саҥа төрүөҕү ньирэй көрөөччүлэргэ туттарбыппыт. Сайылыкка  ыанньыксыттар, сиэмэлээччи, асчыт, бостуук олороллор. Билигин оттуу бараары бэлэмнэнэ сылдьабыт,” – диэн «Тумул» ТХПК биригэдьиирэ Альберт Громов кэпсээтэ.

“Ыам ыйыттан саҕалаан 20 үлэһит тыраахтардары, дискатордардары, сиэйэлкэлэри туһанан Күөллэрики, Ынах алааһа, Калинин бааһыналарга ыһыы үлэтин саҕалаабыта, – диэн агроном Тимур Десяткин билиһиннэрдэ. – Сиик саптарыы, таҥастааһын, уоҕурдуу кэннэ сүөһү аһылыгар анаан 80 гектарга туорахтаах култуураны, 470 гектарга сэлиэһинэйи, ньэчимиэни, эбиэһи ыспыппыт. «Тумул» бурдук хаһаайыстыбата буоларын быһыытынан,  чааһынай дьоҥҥо, кэпэрэтииптэргэ ыһыы сиэмэтин атыылаан эбии дохуот оҥостобут, – диир кини.

Альберт Громов, Дмитрий Десяткин, Спиридон Десяткин салалталарынан кэпэрэтиип үлэһиттэрэ 3 звено тэринэн Эбэ, Кыһыҥҥы Арыылаах, Улахан сыххан алаастарга уонна өрүс кытыытыгар оттууллар. Сайын устата 900 туонна оту бэлэмниир соруктаахтар.

«Кэпэрэтиип үлэһиттэрэ сайыҥҥы ыйдарга өлгөм үүтү ыаһыҥҥа, ыччат сүөһүнү төлөһүтүүгэ, кыстыгы туоруур оту оттоон, эбии аһылыгы бэлэмнээһиҥҥэ туруулаһан үлэлии сылдьаллар,» – диэн РФ тыатын хаһаайыстыбатын үтүөлээх үлэһитэ, тыа хаһаайыстыбатыгар СӨ Судаарыстыбаннай бириэмийэтин лауреата, Доллу нэһилиэгин, Мэҥэ Хаҥалас улууһун, Саха Өрөспүүбүлүкэтин Бочуоттаах гражданина, «Тумул» ТХПК салайааччыта Таисия Десяткина иһитиннэрдэ.

 

Иван Лукин.