«Тумул» тыа хаһаайыстыбатын производственнай кэпэрэтиибигэр бурдук хаһаайыстыбата тэриллибитэ 25 сылын туолла. Доллу нэһилиэгэр СӨ үтүөлээх артыыһа С.Н.Сивцев‒Доллу аатынан норуот айымньытын дьиэтигэр үтүө үгэс буолан сыллата ыытыллар үлэни үөһээ тутан, тыа сирин олоҕун уйгутун уһансар үлэһит дьону уруйдуур үөрүүлээх тэрээһин буолла.
Нэһилиэкпит биир тумус туттар улахан тэрилтэтэ «Тумул» тыа хаһаайыстыбатын производственнай кэпэрэтиибэ таһаарыылаах үлэтинэн улууска, өрөспүүбүлүкэҕэ бастыҥнар кэккэлэригэр сылдьар. «Тумул» ТХПК сүрүн үлэтинэн сиртэн ылыллар үүнүүнү үрдэтэн, ынах- сүөһү иитиитигэр племенной үлэни сайыннаран үгүс үүтү, боруода сүөһүнү үксэтэн, сүөһү иитиититтэн үрдүк дохуоду ылаллар. 1999 с. бастакы бэрэсидьиэн Михаил Николаев ыйааҕынан бурдук хаһаайыстыбата тэриллэн таһаарыылаахтык үлэлиир-хамсыыр. «Тумул» ТХПК нэһилиэк сайдыытыгар, араас улахан тутууларга, тэрээһиннэргэ сүҥкэн көмөнү оҥорор, нэһилиэк культурнай, спортивнай, уопсастыбаннай олоҕор көхтөөх кытталлар. Хаһаайыстыба күнтэн күн үүнэр-сайдар. Нэһилиэк, улуус, өрөспүүбүлүкэ тэрээһиннэригэр кыттан үгүс кэккэ ситиһиилэрдээхтэр.
Үөрүүлээх тэрээһиҥҥэ үлэни таптыыр үтүө дьоммутун, уйгуну үксэтэр чулуу үлэһиттэрбитигэр эҕэрдэ тылы уонна наҕараадалары туттардылар. «Ил Түмэн» Судаарыстыбаннай мунньаҕын дьокутааттара, сиргэ сыһыаннаһыы, айылҕа ресурсаларын уонна экология сис кэмитиэтин бэрэссэдээтэлэ Андрей Находкин уонна наука, үөрэҕирии, култуура, маассабай иһитиннэрэр сириэстибэлэр уонна уопсастыбаннай тэрилтэлэр дьыалаларын сис кэмитиэтин бэрэссэдээтэли солбуйааччытыгар Захар Никитин эҕэрдэлээтилэр. Улууспутугар тыа хаһаайыстыбатын сылынан бу тыын суолталаах салааҕа күннэтэ сыралаһан үлэлии-хамсыы сылдьар тыа сирин туруу үлэһит дьонун оройуон баһылыга Дмитрий Тихонов бэлиэтээтэ. Доллу нэһилиэгин баһылыга Николай Сивцев СӨ тыа хаһаайыстыбата сайдыытыгар үтүмэн кылаатын, өр сыллаах үлэтин иһин СӨ Тырааныспар уонна суол иис хаһаайыстыбатын министиэристибэтин грамотатын Владимир Десяткиҥҥа туттарда.
Улууспутугар тыа хаһаайыстыбата сайдыытыгар сүҥкэн кылааттарын иһин наҕараадалары улуус тыа хаһаайыстыбатын салалтатын салайааччыта Иннокентий Семенов, улуус кылаабынай агранома Василий Бурнашев бастыҥ дьоммутун бэлиэтээн наҕараадалаатылар.
Быйылгы сыл 10 ый түмүгүнэн Эҕэрдэ суругу, сэртипикээттэри тэрилтэ салайааччыта Арассыыйа, СӨ тыа хаһаайыстыбатын үтүөлээх үлэһитэ, СӨ Бочуоттаах олохтооҕо Таисия Десяткина бастыҥ көрдөрүүлээх үлэһиттэригэр анаата.
Үөрүүлээх киэһэни ырыанан-тойугунан Саха сирин, улууспут талба талааннаах ырыаһыттара Инна Донская ‒ Дайаана, Виктор Иванов ‒ Айыллыата Дьырылыат, нэһилиэкпит талааннаахтара Семен Десяткин, Зинаида Толстякова киэргэттилэр.
Тыа хаһаайыстыбата сайдарын туһугар күннэтэ сыраларын ууран туран үлэлиир тутаах үлэһиттэрбитигэр уонна ытыктабыллаах Таисия Васильевнаҕа үлэҕитигэр үрдүк ситиһиилэри, тус бэйэҕитигэр, дьиэ кэргэттэргитигэр дьоллоох, доруобай уһун олоҕу баҕарабыт.
Евгения Птицына.
