Алтынньы 28 күнүгэр ыалдьытымсах Хотун Төҥүлүгэ «Ой дуораана» оҕо образцовай вокальнай ансаамбыла ырыа түһүлгэтигэр доҕотторун түмтэ.
«Тулуйханныын каникулга» тэрээһиҥҥэ Хочоттон «Кэрэли» оҕону эбии үөрэхтээһин киин «Дьэргэлгэн» ансаамбыла (сал. Николай Никаноров), Майаттан «Кэрэли» оҕону эбии үөрэхтээһин киин «Мелодика» ансаамбыла (Елена Апросимова), Төҥүлүттэн «Ой дуораана» (Анна Петухова) уонна ыаллыы сытар Алдан Хатыстыырыттан «Мевакан» эбэҥкилии ырыа ансаамбыла (Мария Васильева) доҕордоһуу кэнсиэрин тэрийдилэр.
Ыраахтан кэлбит ыалдьыттарбыт «Мевакан» ансаамбыл эбэҥкилии тылынан ыллаан, саҥаттан саҥа, кэрэттэн кэрэ ырыалары толорон дьон сүргэтин көтөхтүлэр. «Тулуйханчиктар» Христофор Максимов матыыбыгар «Эйэ холууба», Марина Попова‒Эдьиий Марыына репертуарыттан «Кэскил ырыатын» уостан түһэрбэккэ илдьэ сылдьан сэргэхтик толороллоро үөрдэр. Ону таһынан көрсүһүү киэһэтэ, билсиһии оонньуулара, квест тургутуктара оҕолору түмтэ. Күһүҥҥү каникул оҕолорго туһалаахтык уонна чаҕылхайдык саҕаланна.
Билигин «Тулуйхан» устудьууйа өрөспүүбүлүкэ араас муннуктарынан 14 филиалы сэргэхтик үлэлэтэр. Светлана Александровна, Егор Ильич Неустроевтар оҕолорго анаан өссө да элбэх ырыалары бэлэх ууна турдуннар диэн баҕа санаабытын этэбит, күндү дьоммутунан киэн туттабыт, махталбытын тиэрдэбит!
Елена Апросимова, Төҥүлү.
