Майаҕа бу киинэҕэ киэһээ өттүгэр миэстэ суох буолта 3-с нэдиэлэтэ. Күҥҥэ үстэ буолар.
Бүтэһик нэдиэлэтигэр сарсыарда 10 чаастаах сеанска сырыттым. Ону да Дириҥ дьоно, Байбал Пинигин ийэтэ Харыйаана, учууталым Александра Семеновна Коркина киинэҕэ көстөллөрүн истэн көрөргө быһаарынным. Оттон үс олимпиецтарбыт туһунан кинигэлэри аахпытым, онон билэрим.
Байбал ийэтин Харыйаананы бэркэ да көрдөрдүлэр. Ыалдьан да, онно эбии олоҕо ыараханыттан баттаппыт дьахтар уобраһын артыыска олус да табан биэрдэ! Тута биллим, харахпыттан уу тахсыбытын былатыактаах буолан кисти-саба сотуннум. Киинэ саҥатыгар уонна бүтүүтүгэр тоҕо эрэ харахпыттан уу тахса турда…
Ыарыыга, олоҕор баттаппыт дьахтар уобараһа элбэҕи этэр. Аны олус табан, майгынныыр гына гримнээбиттэр. Бу кылгас эпизод киинэ сүнньүн курдук ылынным.
Байбал, Роман, Сахаачча уобарастарын олус үчүгэйдик биэрбиттэр. Арамааны көрдөххө, үөрүү эрэ көстөр. Байбал букатын дьиҥнээх «хадааровец». Дьирээ, кимиилээх эдэр киһи буолан Монреальга олимпийскай чөмпүйүөн буолбут. Арааһа, ким да күүппэтэх чөмпүйүөн буолан төннөрүн.
Учууталбын Александра Семеновнаны кылааһынньыгым Бааска Флегонтов кыыһа оонньоото. Кини кыыһа артыыска, уола биллэр тустуук буоллаҕа. Саха дьоно бары билэр оҕолоро. Бэркэ сылдьаллар.
Арай биһиги Бааскабытын билбэт буолуохтаахтар уонна аҕатын Борукуопайы. Иккиэн талааннаах артыыс буолуохтаах дьон этилэрэ. Вася оскуолаҕа бэркэ да литературнай ааҕыыны оҥороро. Онтон аҕата Дириҥнээҕи норуодунай тыйаатыр бастыҥ артыыһа буоллаҕа. Олору батан ити кыыс киинэҕэ элбэхтэ уһулунна.
Уопсайынан, киинэ Сахабыт сирин дьонун-сэргэтин үрдүк таһымҥа көрдөрбүт. Онон, Дириҥтэн төрүттээх буоламмын, дойдубун атын харахпынан көрдүм, киэн туттуннум. Саха тустуута Олимп чыпчаалыгар тахсыытыгар Дириҥ дьоно киллэрбит кылааттара баар эбит.
Федот Харитонов.
