Олунньу 11 күнүн иккис аҥарыгар Николай Бочков салайааччылаах үһүс бөлөх отчуоттуур үлэтэ 3-с Мэлдьэхси нэһилиэгэр турда. Манна отчуот мунньаҕын нэһилиэк баһылыгын солбуйааччы Мира Атласова салайан ыытта. Николай Бочков оҥоһуллубут чахчыларга олоҕуран улахан экрааҥҥа бырабыыталыстыба ыытан кэлбит үлэтин саас-сааһынан сиһилии сырдатта. Бу кэннэ ыйытыктарга, этиилэргэ киирдилэр.
Элбэх ыйытыгы бааһынай хаһаайыстыба салайааччыта Давыд Гаврильев суругунан биэрдэ. Кини сир баайын хостуур хампаанньалары ким хонтуруоллуур, өрөспүүбүлүкэ бүддьүөтүгэр дохуоттарыттан биэрэллэр дуо, ыччаты тыа хаһаайыстыбатыгар сыһыарарга туох үлэ барарый, Саха сиригэр демографияны хайдах үрдэтэбит, электроуот сыаната тоҕо наһаа үрдүгүй, сылгыга бэриллэр көмө харчы төһөнүй диэн ыйытта. Бочуоттаах сынньалаҥҥа олорор Евдокия Ноговицына 2017 с. Аллараа Бэстээххэ элбэх оҕолоох дьиэ кэргэҥҥэ бэриллибит кыбаарталларга суоллара, уоттара хаһан тардыллан үлэҕэ киирэрий, эдэр ыалга 35 саастарыгар диэри дьиэ-уот тутталларыгар бэриллэр көмө уочаратын хаамыытын ким хонтуруоллууруй, үс оҕом ити уочараттарыгар тиксибэккэ 35 саастарын аастылар, төрдүс оҕом уочарата олох ыраах, тоҕо дэриэбинэлэргэ олорор эдэр ыал усулуобуйаларын көрөн уочарат тыырыллыбатый, биир сылга хас эдэр ыал ылан туһаммытын тоҕо улууспут хаһыатыгар сырдатан таһаарбаттарый диэн эттэ. Учуутал Дарианна Иванова сылгылары чииптээһин булгуччулаах дуо, оттук сыаната тоҕо ыарыы турарый, “Мичээрэ” уһуйаан сэбиэдиссэйэ Нюргуяна Холмогорова сыана үрдүү турарыгар туох миэрэ ылылларый, өрүс суола сабылыннаҕына “Ирбис” сыанатын ким хонтуруоллууруй, “Томтор” ХЭТ бэрэссэдээтэлэ Денис Жирков сайылык өрөмүөнүгэр туох көмө баарый, тыа хаһаайыстыбатыгар 15-20 сыл үлэлээбиттэргэ биэнсийэҕэ тахсарга бырагыраама баара буоллар, пиэрмэр-урбаанньыт Валерий Никифоров элбэх оҕолоох ыаллар тоҕо киин сиргэ көһөллөрүй, грант ылааччылар төһө сайыннылар, сылгы баазатыгар уот ыстаансыйата, сир оҥоруутугар хонтуруол наадаларын, сыана тоҕо үрдүү турарый, о.д.а. ыйытыктары, этиилэри биэрдилэр.
Николай Владимирович олохтоохторго нэһилиэктэрин сайдыытыгар ис сүрэхтэриттэн кыһаллалларын иһин махтанна итиэннэ илдьэ кэлбит соругун толорон, Томтордооҕу Г.А. уонна А.А. Пономаревтар ааттарынан орто оскуола биологияҕа учууталыгар Туйаара Назароваҕа үөрэх систиэмэтин сайдыытыгар киллэрбит кылаатын иһин СӨ үөрэҕириитин уонна наукатын министиэристибэтин Махтал суругун үөрүүлээхтик туттарда.
Томторго 53 киһи отчуоту иһиттэ, бырабыыталыстыба ыытар үлэтин өйүүллэрин биллэрдилэр.
Марелла Баишева. 
