Тиһэх чуораан күнэ үөрүүлээхтик бэлиэтэннэ

Ходоро нэһилиэгэр Милан Илларионов дириэктэрдээх В.В.Скрябин аатынан орто оскуолаҕа тиһэх чуораан күнэ үрдүк тэрээһиннээхтик ыытылынна.

Любовь Илларионова салайааччылаах 11-с кылааһы Анисим Федоров уонна Виктор Барашков бүтэрдилэр. Оскуола бастыҥ уопсастыбанньыктара үөрэхтэрин “4”, “5” сыананан уонна успуорка үрдүк ситиһиилэрдээх түмүктээтилэр.

Татьяна Никифорова салайар 4-с кылааһын 8 оҕо, Клара Попова салайар 9-с кылааһын 11 оҕо бүтэрдилэр.

Оскуоланы бүтэрээччилэри улуус дьаһалтатын, үөрэх, култуура управлениеларын, оскуола дьаһалтатын, нэһилиэк тэрилтэлэрин салайааччылара, исписэлиистэрэ истиҥник эҕэрдэлээтилэр, оскуола мэссэнээттэрэ анал истипиэндьийэлэрин анаан туттардылар.

Биир ураты үөрүүлээх түгэнинэн Дыгын Оонньууларын 7 төгүллээх кыайыылааҕа Иван Белолюбскай анал бирииһин 9-с кылаас үөрэнээччитэ, оскуола бастыҥ спортсмена Саид Дмитриев тутан үөрүү өрөгөйүн биллэ.

Оҕолорго судаарыстыбаннай эксээмэннэрин ситиһиилээхтик туттаран, баҕарар үөрэхтэригэр киирэн олох киэҥ аартыгар чиҥник үктэнэллэригэр баҕарабыт.

 

Марелла Баишева.