Бүгүн, тохсунньу 27 күнүгэр, улуус баһылыга Дмитрий Тихонов 2023 сыллаах үлэтин отчуотун 1-кы Наахара нэһилиэгэр туруорда. Манна Ил Түмэн дьокутаата, сир баайыгар уонна айылҕа боппуруостарыгар сис кэмитиэт бэрэссэдээтэлэ Андрей Находкин, улуус дьокутааттарын сэбиэтин бэрэссэдээтэлэ Иннокентий Андросов, “Армон” салайааччыта Ян Новиков, управлениелар, тэрилтэлэр салайааччылара кыттыыны ыллылар. Мунньаҕы нэһилиэк баһылыга Иннокентий Исаков иилээн ыытта.
Ааспыт сылга нэһилиэнньэттэн 6 боппуруос турбутуттан 5 хонтуруолга ылыллан үлэлии тураллар, биир сүрүн боппуруос оскуола тутуута баар.
Бочуоттаах сынньалаҥҥа олорор үлэ бэтэрээннэрэ Василий Солдатов, Татьяна Лукина, доруобуйатынан 2-с группалаах инбэлиит Василий Васильев, СӨ үтүөлээх пиэрмэрэ үрдүк ааты ылбыт бааһынай хаһаайыстыба салайааччыта Наталья Данилова, успуорт саала дириэктэрэ Марфа Макарова нэһилиэктэрин кыһалҕалаах боппуруостарын хото ыйыттылар, ону сэргэ, элбэх боппуруос суругунан киирдэ.
Улууска быраас тоҕо тиийбэтий, аптека суоҕа, Хочо балыыһата тоҕо үлэлээбэт, көһө сылдьар биригээдэ тоҕо кэлбэт, МРТ тоҕо суоҕуй, саҥа сылга анал байыаннай дьайыыга сылдьар дьон дьиэ кэргэттэригэр туох көмө баарый, кимнээх көмө ылыахтаахтарый, Дьиэ кэргэн сылынан туох көмө баарый, Майа собуота тоҕо үлэлээбэт, тыа хаһаайыстыбатын сылынан туох үлэ барарын, кулуупка, успуорт саалаҕа өрөмүөн оҥоһуллуо дуо, сир ирэн дьиэ акылаата түспүтүн атын сиргэ көһөрөргө көмө баар буолуо дуо, кыһыҥҥы суол тоҕо ыраастаммат, бэтэринээр өҥөтүн төлөбүрэ ыараханын, Аллараа Бэстээххэ элбэх оҕолоохторго бэриллибит уһаайбаларга туох үлэ барар, уһаайба салгыы бэриллэр дуо, маҕаһыыннарга сыанаҕа хонтуруол баар дуо, интэриниэт хаһан тупсарын, үрдүк күүрүүлээх уот ситимигэр салгыы өрөмүөн үлэтэ барарын, ититии ситимигэр холбонуу, ыт элбээбитин, балбаах боппуруоһугар, биэнсийэлээх дьоҥҥо социальнай хантараакка кыттарга туох ирдэнэрий, о.д.а. барыта 40-ча ыйытык оҥоһуллубутугар туһааннаах салайааччылар толору быһааран эппиэттээтилэр.
Нэһилиэк аҥаарын киин ититии систиэмэтигэр холбуурга, эбии бэтэринээр наадатын, кэпэрэтиип хотонун тутарга, үрэх уутун тохтоторго аһыллар-сабыллар быһыт оҥорторорго, сайылыкка электроуоту киллэртэрэргэ, куулаҕа олорор 7 ыалга “Газгольдер” оһоҕу киллэрэри үөрэтэргэ, оттуур сир боппуруоһа, сэлээркэ, бэнсиин сыаната үрдүүрүн, биэнсийэ эбиллиитэ кыратын, тыа дьонугар манна көмө наадатын, оскуола оҕотун бары өттүнэн киэҥник сайыннарар наадатын, патриотическай ырыалары үөрэтэргэ, уопсай баанньык наадатын, о.д.а. этиилэр киирдилэр.
Отчуот 15-с нэһилиэгэр ыытылынна уонна саамай элбэх боппуруос киирбит нэһилиэгэ буолла диэн Иннокентий Андросов бэлиэтээтэ.
Дмитрий Иванович судаарыстыба дьонтон турарынан олохтоохтору нэһилиэнньэ ахсаана элбииригэр болҕомтолоохтук сыһыаннаһарга ыҥырда. Олохтоохтор кэлиҥҥи сылларга Ил Түмэн дьокутааттара элбэхтик кэлэллэрин, нэһилиэк сайдыытыгар элбэҕи оҥороллоругар махтаннылар.
Отчуоту 66 киһи иһиттэ, улуус салалтатын үлэтигэр ситиһиилэри баҕардылар.
Марелла Баишева.
