Кыһыҥҥы бытарҕан тымныылаах биир үтүө күн, отунан-маһынан дьарыгырар, сүөһү –сылгы дьарыктаах сахалыы тыыннаах Мэҥэ-Хаҥалас улууһун биир уһук түөлбэтигэр Тиэлигигэ үөрүүлээх сонун кэллэ. Тиэлигитээҕи Степанида Борисова аатынан норуот айымньытын дьиэтин үлэһиттэрин көҕүлээһиннэринэн, өрөспүүбүлүкэҕэ ыытыллыбыт “Төрөөбүт тылым-норуотум киэн туттуута” диэн ааттаах куонкуруска кыттаннар ситиһии көтөллөннүлэр.
Оҕолорго, ыччаттарга төрөөбүт тылы сайыннарыыга туһуламмыт номинацияҕа “Төрөөбүт тылбынан көрөбүн” диэн бырайыак кыайыылаах ааты ситистэ уонна 500000 солкуобай бириэмийэни тутта.
Бу бырайыак үлэлээбитэ үһүс сылыгар ситиһиилээхтик дьиҥ-чахчы үлэлии олорор бырайыактартан биирдэстэрэ буолар. Ол курдук, аан бастаан биир улахан үлэтинэн, аан дойдуга көрөөччү биһирэбилин ылбыт уонна саамай биллибит киинэлэртэн биирдэстэрэ “Один дома” киинэ иккис чааһа сахалыы саҥаран көрөөччү дьүүлүгэр тахсыбыта, нэһилиэнньэ үгүс араҥата кыттыһан , оруоллары үллэстэн толорбуттара, олус астыммыттара.
Даҕатан эттэххэ, “Хомпу” диэн ааттаах киинэ, видео оҥорор, монтаажтыыр, уһулар устуудьуйа Тиэлиги кулуубар үлэлээбитэ ыраатта. “Оҕо саас суох, “Таҥха түүн түүл”, “Андыһыттар”, остуоруйалара “Морозко”, “Золушка”, сахалыы тылбаастаммыт мультиктара “Кунг-фу Панда”, “ Босс молокосос” интернет ситимигэр дьон биһирэбилин ылбыта.
Ол кэнниттэн, айар ыллык тэтимигэр киирэн, “Кунгфу Панда” ойуулук икки чааһын сахалыы саҥардан, көрөөччү сыанабылыгар өрөспүүбүлүкэбит улахан киинэ тыйаатырдарыгар таҕыста. Бу ойуулукка, нэһилиэк дьоно эрэ буолбакка, улуустааҕы култуура киинин үлэһиттэрэ, улууспут биллэр-көстөр дьонноро кыттыыны ылбыттара. Төрөөбүт тылы тарҕатар уопсастыбаннай түмсүүлэр кэлэн көрбүттэрэ уонна маннык ойуулуктар оҕо, ыччат төрөөбүт тылын таптыырыгар, үөрэтэригэр биир туһалаах саҕалааһыннартан биирдэстэрин буоларын биһирээтилэр.
Маннык үлэлии олорор бырайыактары өйүүр бырагыраамалар, куонкурустар бааллара олус үчүгэй, тыа сиригэр айар-тутар дьоҥҥо төһүү күүс-көмө, сайдалларыгар кыаҕы биэрэрин биһириибит уонна төрөөбүт тылбыт сүппэтигэр үлэлэр өссө элбии турдуннар диэн баҕарабыт.
Сергеева Сардана нэһилиэк бибилэтиэкэрэ.
