Бүгүн, олунньу 13 күнэ – бараммат баай сахабыт тылын күнэ. Бу күн Саха сирин үрдүнэн СӨ Национальнай бибилэтиэкэ тэрийэр төрөөбүт тыл, сурук-бичик дэкээдэтин чэрчитинэн “Сахалыы дьыктаан” аахсыйата ыытылынна.
Аахсыйа өбүгэттэн кэлбит саха тылын чөл тутар, кэнчээри ыччакка төрөөбүт тылыгар тапталы үөскэтэр, таба саҥарарга, суруйарга көҕүлүүр киэҥ ис хоһоонноох. Кырдьык да, классик суруйааччыларбыт айымньылара куйааска сөрүүн сүөгэй сүрэҕи уоскутарын курдук иэйиини үөскэтэллэр эбээт!
Улуустааҕы И.М.Сосин аатынан киин бибилэтиэкэ идэлээх үлэһиттэрэ Марина Трифонова, Алтаана Зыкова, Екатерина Дмитриева күн бастакы аҥаарыгар Мэҥэ Хаҥалас улууһун киинигэр Аллараа Бэстээххэ улуус дьаһалтатын дьиэтигэр аахсыйаны ыыттылар. Манна улуус дьаһалтатын үлэһиттэрэ бэйэлэрин бэрэбиэркэлэнэн, сахалыы дьыктааны быйыл иккис сылын суруйдулар. Майаҕа И.М.Сосин аатынан киин бибилэтиэкэҕэ ыытыллыбыт аахсыйаҕа 15 көхтөөх ааҕааччылар кыттыыны ыллылар, ол иһиттэн дьыктааны саҥа суруйар дьон кэлбиттэрэ бибилэтиэкэрдэри үөртэ.
Сахалыы дьыктаан Кыайыы 80 сылынан буойун-суруйааччы Тимофей Сметанин “Кыайбыттар ыһыахтара” айымньытыттан быһа тардан сурулунна. Аахсыйа кыттыылаахтарыгар Туоһу суруктар туттарылыннылар.
Ийэбит үүтүн кытта бэриллибит төрөөбүт төрүт тылбытын таптыаҕыҥ, харыстыаҕыҥ, сүмэтин сүтэримиэҕиҥ!
Марелла Баишева.
