2018 сыллаахха Дьокуускайга Саха сирин олохтоохторун төрүччүтүн 1 сийиэһэ 500 тахса дэлэгээти түмпүтэ. Ааспыт сайын төрүччү 2 сийиэһэ олус өрө көтөҕүллүүлээхтик ааспыта, биһиги улууспутуттан элбэх киһи кыттыыны ылбыта.
Бу сийиэскэ бэрэпиэссэр Андрей Саввич Саввинов «Бу орто дойдуга киһи төрүччүтүн Аал Луук маһын тупсарар, сайыннарар туһугар олоруохтаах», диэбитэ.
Төрүччү- сомоҕолуур улуу күүс. Аймах хаан буккуллубатын туһугар төрүччүтүн үөрэтиэхтээх.
Хаан 7-с көлүөнэттэн ырааһыгар, ол эрэ кэнниттэн ыччаттар ыал буолуохтарын сөп.
Бүгүн «Дьол түһүлгэтигэр «ыытыллыбыт дьарык -үөрэххэ кэлбит дьон «Древо-5 «бырагыраамаҕа төрүччүлэрин оҥоро үөрэннилэр. Саха сирин олохтоохторо бу Новосибирскайдар оҥорбут
бырагыраамаларын туһаналлара ордук табыгастаах.
Салаа аймахтаргын атын төрүччүттэн булан ылан бэйэҥ бырагыгаамаҕар көһөрөн ылар кыахтанаҕын.
Дьарык-үөрэҕи Майа олохтооҕо, «Эркээйи » хаһыат үлэһитэ Дария Николаевна Михайлова бэрт өйдөнүмтүөтүк ыытта. Кини бэйэтин аймаҕын төрүччүтүн 2019 сылтан саҕалаан 1200 киһини киллэрэн олус баай, кэрэхсэбиллээх архыыбы муспут. «Древо-5» бырагыраамаҕа төрүччүгэ киирэр хас биирдии киһи туһунан сиһилии информацияны, хаартыскалары, видеоматырыйаалы, кинигэни кинигэнэн киллэриэххэ сөп. Хас биирдии киһи туһунан кини аҋмахха туох сыһыаннааҕа нарыланан тахсан иһэр.
Төрүччүгэ бэл киһи хаста кэргэннэммитэ, онно оҕолоро, батыһыннарыы оҕолоро, арахсыбыт кэргэннэрэ- бары киириэхтэрин сөп, оччоҕуна хаан ситимэ хайдах баарынан тахсан кэлэр.
Төрүччүтүн билэр киһи икки кынаттанар. Уҥа кынатыҥ- аҕаҥ удьуора. Хаҥас кынатыҥ- ийэҥ аймахтара.
Билигин аймах саастаах ытык дьонун кэпсээнин видеоҕа устан бырагыраамаҕа угара ханнык баҕарар төрүччүнү байытар.
Сэминээргэ национальнай архыыпка регистрацияланарга ,наадалаах матырыйаалы көрдөөн буларга үөрэннилэр.
Кэлбит дьон санааларын ситэн, билбэттэрин билэн, ыйытыктарыгар хоруй ылан төрүччүлэрин оҥостор, ситэрэр- хоторор кыахха киирэн махтанан тарҕастылар.
Кэлэр өттүгэр маннык үөрэҕи өссө кэҥэтэн, дириҥэтэн ыытарга сүбэлэстилэр.
Евдокия Решетникова
