Сааскы чаҕылхай күҥҥэ Дмитрий Ходулов аатынан култуура киинэ оҕо чуопчаарар саҥатынан туолла. Сүүһүнэн оҕо ийэтиниин сахалыы ааҕыы марафонун түмүктүүр тэрээһинигэр мустубут. Ийэлэр уонна оҕолор сахалыы сайбаччы таҥнан кэлбиттэрин олус сэргии көрдүм.
Кыттааччылартан тэрээһин туһунан санааларын иһиттибит. Олортон Анисимовтар кэпсээбиттэрин ааҕааччыларга тиэрдэбин. Егор Дмитриевич Кычкин аатынан Матта орто оскуолатыттан 5 ыал кэлбит. Кулун тутар 1 күнүттэн саҕалаан 21 күнүгэр диэри марафоҥҥа сахалыы аахпыт ыаллартан биэс ыал үлэлэрин түмүгүнэн чорботуллан түмүктүүр тэрээһиҥҥэ ыҥырыллыбыттар.
Тин уонна Марина Филипповна Анисимовтар:
— Оскуолабыт иһигэр марафоҥҥа 19 дьиэ кэргэн кыттыыны ылла. Бүгун бу үөрүүлээх тэрээһиҥҥэ 5 ыал кэллибит: Турантаевтар, Сивцевтэр, Протодьяконовтар, Тимофеевтар, Анисимовтар. Бу марафоҥҥа кыттарга учууталбыт эппитигэр үөрүүнү кытта сөбүлэспиппит. Кинигэлэри дьиэтээҕи уонна оскуола бибилэтиэкэтиттэн талан аахтыбыт. Оҕо бэйэтэ ааҕара, ийэ ааҕара уонна оҕо иһигэр ааҕара диэн сорудаҕы биһирээтибит. Аааҕыыга омуннаах-төлөннөөх гына аахтахха, оҕо ис иэйиитэ уһуктар. Сүрүннээн Данил Макеев суруйбут “Саанчык сайыҥҥы быһылааннара» диэн кинигэни сөбүлээтибит. Тугу барытын билиэн-көрүөн баҕалаах Саанчык уол олоҕун билсэн, сайыҥҥы сынньалаҥ кэмигэр араас быһылааннарга түбэһэрин таттаран туран аахтыбыт. Иккис кылааска бэриллэр эбии ааҕыы матыраайалыттан кинигэлэри ылан аахтыбыт. Тин ордук “Наһаа ынырык уол дии”, “Куурусса таҥараны итэҕэйэр дуо?” диэн кэпсээннэри сөбүлээтэ. Егор Дмитриевич Кычкин үбүлүөйүгэр сөп түбэһиннэрэн, кулун тутар 16 күнүгэр хоһоон айбыппыт. Ол хоһоону эмиэ ааҕыыбыт чэрчитинэн киллэрэн биэрбиппит. Марафон өйтөн суруйуулааҕа, хоһоон айар уонна уруһуйдуур түһүмэхтэрдээҕэ кэрэхсэтэр. Биллэн турар, иккис кылаас оҕотугар төрөппүт син биир көмөлөһөр. Саамай сүрүнэ диэн оҕо ис хоһоонун өйдөөн ааҕыахтаах. Маннык тэрээһиннэр олус туһалаахтар: оҕо сахалыы умсугуйан ааҕар буолар. Сыалай 21 күнү быһа эбии кинигэ аахпыта, 21 айымньыны ааҕан, ис хоһоонун өйдөөбүтэ – бу биһиэхэ улахан ситиһии буолар.
Марина Филипповна оскуолаҕа үлэлиир, икки оҕолоох. Кыыстара Майя улахан, номнуо ыал, икки оҕолоох. Тин иккис кылаас туйгун үөрэнээччитэ, тустуунан дьарыктанар. Төрөөбүт тылын олус сөбүлүүр, хоһоон ааҕыытыгар кэккэ ситиһиилэрдээх. Аата сэдэҕин иһин ыйытан билбиппит, Валентин диэн аҕатын аатын кылгатан Тин диэн сүрэхтээбиттэр эбит.
Билиҥҥи кэмҥэ оҕо аахпат буолуута элбэхтик көстөр, ордук сахалыы ааҕалларын ыарырҕаталлар, аахпыттарын үчүгэйдик өйдөөбөттөр. Марафоҥҥа барыта 600 ыал кыттынна. Онон бу 21 күннээх ааҕыы марафона элбэх ыалга туһалаата уонна тэтимин ыһыктыбакка салҕана туруо диэн эрэнэбит.
Елизавета Неустроева.