Бырабыыталыстыба бастакы бөлөҕө олунньу 12 күнүгэр Төҥүлү нэһилиэгэр отчуоту туруорда. Бөлөх салайааччыта Петр Попов нэһилиэк олохтоохторун улуус төрүттэммитэ 95 сылын бэлиэтиир күҥҥэ сыл түмүгүнэн социальнай-экэнэмиичэскэй көрдөрүүлэринэн куоталаһыыга бэйэтин бөлөҕөр кыайыылааҕынан тахсыбытынан эҕэрдэлээтэ.
Өрөспүүбүлүкэ ситэриилээх былааһын 2024 сыллаах үлэтин отчуота экраҥҥа сырдатыллыбытын кэннэ былырыыҥҥы отчуокка киирбит этиилэринэн туох үлэ барбытын ырыттылар.
Салгыы олохтоохтор ыйытыы биэрэн, тыл этэн бүгүҥҥү күҥҥэ баар кыһалҕаларын этиннилэр, кэпсэтиигэ көхтөөхтүк кытыннылар. Төҥүлү нэһилиэгэ «Сайдыы тирэх пууна» диэн бырайыакка киириитин боппуруоһа хайдах быһаарыллар буолбутун, оскуола өрөмүөнэ мөлтөх хаачыстыбалаахтык барбытыгар ким эппиэттиирин, уот, уматык, гаас уонна гаас тэрилин тэхиниичэскэй көрүү иһин төлөбүрдэри, хаайтарыы кэмигэр эбэни салгын олбохтоох оҥочонон туоратыы тарыыбын хонтуруолааһын туһунан, о.д.а. ыйытыктары биэрдилэр.
Галина Громова тыыл бэтэрээннэригэр дьиэ өрөмүөнүгэр көрүллэр көмө кээмэйин үрдэтэри, Иннокентий Титов нэһилиэккэ почта наадатын, Николай Борисов успуорт саалатын тутууну туруорсан эттилэр. Надежда Оконешникова ДьУоКХ, Николай Стрекаловскай «Саха сирин экологияҕа ситимнэрэ» тэрилтэлэр үлэлэрин итэҕэстэригэр тохтоотулар, бөх тоҕор сир үрдүнэн гаас сүрүн утаҕа ааһарынан сыбаалканы бэрээдэктээһин наадатын ыйдылар.
«Хоту» кэпэрэтиип салайааччыта Иван Максимов Бырабыыталыстыбаҕа улуус кураатарыгар Петр Поповка үлэҕэ-хамнаска өйөбүлүн иһин махтанарын эттэ. Билигин тэрилтэ улуус киинигэр Аллараа Бэстээххэ баар сиригэр-уотугар үлэлэтэргэ былаанныыр 140 мөлүйүөн суумалаах саҥа бырайыакка – ас кэмбинээтин тутууга үлэлии сылдьалларын туһунан иһитиннэрдэ.
Нэһилиэк устуоруйатыттан саҕалаан сайдыы кэрдиис кэмигэр, айан-сырыы үөдүйэн, кэрэ айылҕата кэхтиигэ кэлбэтин туһуттан, федеральнай суол аспаалламмыта олус үчүгэйин ыйан туран, аны Бороҕоннуур суолга нэһилиэк чэрчитинэн 10 килэмиэтири аспааллыыры Анатолий Плотников туруоруста. Надежда Федотова гаас киирбитин кэннэ дьиэлэр хамсаан, түһэн бараллар, онуоха өйөбүл көрүллэригэр, бэтэринээр өҥөтүн төлөбүрүн чэпчэтиини үөрэтэн көрөллөрүгэр санаатын эттэ.
Тыа хаһаайыстыбатын бородууксуйатын оҥорон таһаарааччылары судаарыстыба өттүттэн грант, субсидия көмөтүнэн өйөбүл көрүҥнэригэр бэйэлэрин тус санааларын Николай Баишев, Августа Тимофеева эттилэр. Кинилэр “Саха киһитэ былыр да, билигин да сүөһү ииттэн, үлэлээн-хамсаан, салгыҥҥа хамсанан доруобуйатын тупсарар, үлэ – дьарык, үлэ – дьол” диэн өрө күүрүүлээх, санаа көтөҕүүлээх этиилэрин кытта сөпсөспөт киһи суох.
Баһылык Петр Эверстов нэһилиэк сүрүн туруорсууларын түмэн иһитиннэрдэ, киирбит этиилэр болҕомтоҕо ылыллыахтарыгар эрэнэрин эттэ.
Олохтоохтор отчуоту истэ 100 буолан сааланы толору мустубуттарыгар, кэпсэтиигэ көхтөөх кыттыыны ылбыттарыгар бөлөх салайааччыта Петр Попов махтанна. Үүүмүт сылга таһаарыылаах үлэни, чэгиэн туругу, этэҥҥэ буолууну баҕарда.
Февронья ОХЛОПКОВА.
