Сэтинньи 8 күнүгэр Төҥүлү «Эйгэ» култуура киинигэр Арассыыйа Суруналыыстарын, Суруйааччылар сойуустарын норуоттар икки ардыларынааҕы түмсүүтүн, Саха Өрөспүүбүлүкэтин сойууһун чилиэнэ, Төҥүлү нэһилиэгин Бочуоттаах гражданина Иван Тарабукин‒Талыман «Сирдээҕи төлкөм» кинигэтин сүрэхтэниитэ буолла.
Талыман ‒ элбэх кинигэ ааптара. Бастакы кинигэтинэн “Мэҥэ Хаҥалас улууһун Төҥүлү оскуолатын историята» буолар. Ол кэннэ Кыайыы 60 сылыгар аналлаах «Кыайыы көмүс көлөһүнэ», «Элэмэс кулунчук», «Дьокуускай харах уутун итэҕэйбэт» кинигэлэрэ утуу-субуу күн сирин көрбүттэрэ. Марфа Куличкина «Сүүнэ тыл сүмэтин булларбыан» кинигэтэ тахсарыгар үлэлэспитэ.
Устуоруйаны билии төрөөбүт дойдуттан саҕаланар. Талыман ‒ төрөөбүт дойду историятын үөрэтээччи, Төҥүлү нэһилиэгин гимнин ааптара. «Төҥүлү нэһилиэгэ», «М.Горькай совхоз ‒ түмсүүлээх үлэ кэмэ», «Таптыыр-таптыыр Тараппыт», «Күөрэй дуу, күөрэгэйим», «Спорт ‒ улуус хоту эҥэрин нэһилиэктэригэр”, «Төҥүлү нэһилиэгэ» кинигэлэр ааптардара.
Бу күн ааптар саҥа «Сирдээҕи төлкөм» кинигэтин билиһиннэрдэ, биир дойдулаахтара, санаалаахтара, нэһилиэк кэнчээри ыччаттара кыттыыны ыллылар. Кинигэ дьоҥҥо-сэргэҕэ үгүс өйдөбүлү саҕыаҕа, өйү-санааны сааһылыаҕа дии саныыбыт. Кэлэр көлүөнэ ыччат төрөөбүт дойдутун устуоруйатыгар болҕомтотун ууран үөрэтэн, чинчийэн элбэҕи билиэҕэ, үөрэтиэҕэ уонна туһалааҕы үйэтитиэҕэ диэн эрэнэбит. Киэн туттар Төҥүлүбүт аатын ааттатар суруйааччыбыт Уйбаан Тарабыыкын-Талыман өссө да элбэх баай ис хоһоонноох кинигэлэрин тахса турдуннар.
«Төҥүлү уоттара» түмсүү, Мэҥэ Хаҥалас
