Күн иккис аҥаарыгар СӨ Бырабыыталыстыбатын ааспыт сыллааҕы үлэтин отчуоттуур бастакы бөлөҕө Тараҕай нэһилиэгэр үлэлээтэ.
Отчуоту СӨ Экэниэмикэҕэ миниистирэ Петр Попов туруорда.
Мунньахха 55 киһи кытынна. Отчуот сүнньүнэн олохтоохтор бэйэлэрин долгутар ыйытыыларын биэрдилэр. Чуолаан тыа сиригэр производствоны сайыннарыы, төрөөбүт тылга харыстабыллаахтык сыһыаннаһыы, оскуола, оҕо саадын, балыыһа, култуура дьиэлэрин тутуулара, биэлсэринэн, бырааһынан хааччыллыы, оскуолаҕа педагогическай кылааһы аһыы, кэтэх хаһаайыстыбаҕа сылгыны үөрдээн иитээччилэргэ көмө харчы көрүллүүтэ, кырдьаҕас дьону толору хааччыллыылаах олорор дьиэнэн хааччыйыы, уматык сыанатын үрдээһинэ, оскуолаҕа саха тылын, литературатын чааһын эбиллиитэ интэриэһиргэттэ.
Тыл эппиттэртэн бэтэринээр быраас Павел Слепцов тыа хаһаайыстыбатын үлэһиттэрин хамнастарын, биэнсийэ кээмэйин үрдээһинин болҕомтоҕо ылалларыгар, педагогическай үлэ бэтэрээнэ Павел Егоров биэнсийэ туохха да тиийбэтин, үлэ бэтэрээнэ Николай Негнюров бырааһынан хааччыллыы боппуруоһа чугастааҕы кэминэн быһааралларын туруорустулар. Кинилэр Саха сирин ыччаттара быстах байыаннай дьайыыга ыҥырыллыыларыгар санааларын эттилэр.
Нэһилиэк баһылыга Юрий Порядин Бырабыыталыстыба аатыгар нэһилиэк инники сайдыытыгар туһааннаах туруорсууларын кумааҕыга тиһэн бөлөх салайааччытыгар Петр Поповка туттарда. Экэниэмикэ миниистирэ нэһилиэк дьаһалтатын, олохтоохторун туруорсуулара үөрэтиллэн инникитин хамсааһын тахсарыгар үлэлэһиэхпит диэн эрэннэрдэ. Кини мунньахха кэлбит дьон ортолоругар Уус Алдан улууһугар Хомустаах начаалынай оскуолатыгар үөрэппит учуутала Василиса Никифоровна Григорьеваны көрөн үөрбүтүн эттэ уонна учууталыгар истиҥник махтанна.
Улуус баһылыга Дмитрий Тихонов отчуоттуур мунньаҕы түмүктүүр этиитигэр Тараҕай нэһилиэгин олохтоохторун нэһилиэк, улуус, өрөспүүбүлүкэ инники сайдыыларыгар, ол иһигэр сүрүн салаабытыгар — тыа хаһаайыстыбатыгар биир сүбэнэн түмсүүлээхтик үлэлииргэ ыҥырда.
Алена Докторова.
