Тыа сирин олохтоохторугар кыстыкка киириигэ түбүк үгүс, олортон биирдэстэрэ муус ылыыта буолар.
Ол сиэринэн, Табаҕалар сыл аайы муус ылыытын бүтүн нэһилиэгинэн анал аахсыйа тэрийэллэр. Үгэс быһыытынан биир сүбэнэн, сэтинньи 7️⃣ күнүгэр соҕотох олорор кырдьаҕас, аҕам саастаах, инбэлиит дьоммутугар, байыаннай дьайыыга сылдьар уолаттарбыт дьиэ кэргэттэригэр, субуотунньук аахсыйаны тэрийэн, нэһилиэкпит эр дьоно муус ылыытыгар күргүөмүнэн түһүнэн, үгүс ыалы мууһунан хааччыйан, тутатына тиэйэн киллэрдилэр. Дьон үөрүүтэ, махтала муҥура суох. Ол күн итии чэй, миин өрүнэн үссэнэн, үлэбит биллибэккэ ааста. Нэһилиэкпит үлэни өрө туппут дьонугар, ыччаттарбытыгар, бука бары тэрилтэлэрбит эр дьонугар барҕа махталбытын тиэрдэбит. Бары чэгиэн-доруобай, уйгулаах олохтонуҥ. Бу курдук, нэһилиэк дьоно түмсүүлээх буолан «Ойуурдаах куобах охтубат, дьонноох киһи тутайбат».
Туяра Михайлова, Тараҕай нэһилиэгин бибилэтиэкэрэ
