В.К.Степанов аатын сүгэр култуура уонна успуорт эстэпиэтэтин 1-кы бөлөҕө олунньу 17 күнүгэр Хорообут нэһилиэгэр оһуохай, быыстапка, күрэхтэһии түһүлгэтин көрдө. Киэһэтин Тараҕай нэһилиэгин уус-уран самодеятельноһын кэнсиэрин көрүү буолла.
Оһуокай. Үтүмэн үгүс үйэлэр тухары ханна да харгыстаммакка, ситими сүтэрбэккэ, ураты кэрэ матыыптаах түөлбэ ырыата-тойуга – мэҥэлии оһуокай Хорообут нэһилиэгэр көлүөнэлэри ситимниир. Омоллоон оонньуутун, үрүҥ күн үҥкүүтүн, оһуокайы төрүттээбит кэлэр кэнэҕэс кэмнэргэ элбэҕи эрэннэрэр кэскиллээх этээччи – Эдгард Пинигин, эриэккэс эһиэкэй эркиннээх эдэр ыччат – Арсений Андреев, төрүт үгэһи киэҥ эйгэҕэ тарҕатааччы, уһуйааччы – Александра Пинигина чуор куоластарынан, хомоҕой хоһооннорунан ураты төрүт эйгэни олохтоотулар. Көрүү түмүгүнэн Эдгард Пинигин грамотанан, Арсений Андреев, ону тэҥэ Александра Пинигина дипломант үрдүк аатын ыллылар. Хорообут нэһилиэгин оһуокайа 3,87 баалга сыаналанна.
Быыстапка көрүҥнэригэр нэһилиэк 6 түмсүүтэ үлэлэспитэ хайҕабыллаах: туойтан, туостан, төрүт иискэ, куукула оҥоһуктары оҥорууга ситимнээх үлэ барбытын бэлиэтиибит. Норуот маастара Федор Скрябин саха иһитигэр чороонноро, кытыйалара; эдэр кэскиллээх тимир ууһа Александр Борисов үлэлэрэ (сахалыы быһах) быыстапканы киэргэттилэр. Уопсайа 12 дипломант, 4 лауреат үрдүк ааттара туттарылынна. Быыстапка уопсай сыанабыла 3,98 баалга таҕыста.
Кэнсиэр. кэнсиэр өрө көтөҕүллүүлээхтик, толору саалаҕа биир тыынынан ааста. Лауреаттарынан: хуор толоруутугар «Тыыннаахтар умнубат сыллара», “Төлөн”, «Сайдыына» ырыа ансаамбыла, уус-уран ааҕыы, сценка, биирдиилээн ырыалар – Елена Александрова, Павел Егоров, дуэт – Павел Егоров уонна Павел Слепцов, «Тыа уолаттара» «Чобуо» чабырҕахсыттар бөлөхтөрө ааттаннылар. Дипломаннарынан «Өбүгэ быстыбат ситимэ» фольклорнай композиция, хуор «Мэҥэлэр Өрөгөй ырыалара”, “Дорога на Берлин” үҥкүү, сценка, «Дьиэрэҥкэй» үҥкүү, трио ырыа, пантомима, “Уол Табаҕа ыччата” ыччат бөлөҕө буоллулар.
Табаҕалар кэнсиэртэрэ 4,17 баалынан сыаналанна.
