Майа сэлиэнньэтигэр “Таала күөл” норуот пааркатыгар олунньу 22 күнүгэр улахан дьоҥҥо «Дьоллоох оҕо саас» диэн иккис төгүлүн ыытыллар аһаҕас өрөспүүбүлүкэтээҕи хаартан оҥоһук күрэҕэ буолан ааста. Манна уопсайа 12 хамаанда кэлэн кыттыыны ылла. Үлэ ис хоһооно Улуу Кыайыы 80, Манчаары Баһылай төрөөбүтэ 220, Мэҥэ Хаҥалас улууһа төрүүттэммитэ 95, Майа сэлиэнньэтигэр Төрүччү сылларыгар тирэҕирэн хаар оҥоһуктары оҥордулар.
Дьүүллүүр сүбэҕэ Майа сэлиэнньэтин баһылыга Алексей Неустроев, норуоттар икки ардыларынааҕы күрэх элбэх төгүллээх кыайыылааҕа Архип Скрябин, дьаһалта уопсастыбаннаһы кытары үлэҕэ исписэлииһэ Жанна Тумусова үлэлээтилэр. Сыанабыл быһар чэпчэкитэ суох буолла, оҥоһуктар бары да үчүгэйдэр, ол да буоллар биир түмүккэ кэллилэр.
Түмүккэ дьүүллүүр сүбэ быһаарыытынан 1-кы миэстэни Николай, Алгыстаан Колодезниковтар (Дьокуускай) ылан 30 тыһыынча солкуобай суумалаах бирииһи туттулар. 2-с миэстэҕэ Дьулус Марков, Андрей Местников (Наахара) тигистилэр, 20 тыһыынчалаах бирииһи ыллылар. 3-с миэстэҕэ Афанасий Мучин, Сергей Скрябин (Аллараа Бэстээх) тигистилэр, 10 тыһыынча солкуобайынан бэлиэтэннилэр. Бастыҥнар мэтээлинэн, куубагынан наҕараадаланнылар.
Ону таһынан «Кыайыыга дьулуурдаах» анал аат, харчынан бириэмийэ Мөҥүрүөн нэһилиэгиттэн Дарья, Аркадий Сивцевтэр дьиэ кэргэҥҥэ ананна. Ыраахтан кэлбит Таатта улууһун ыалдьыттарыгар Боппосовтар дьиэ кэргэҥҥэ Майа сэлиэнньэтин баһылыга Алексей Неустроев 2 туомнаах Майа сэлиэнньэтин устуоруйатын кэрэһэлиир кинигэтин бэлэх уунна.
Күрэх кыттыылаахтарыгар барыларыгар туоһу суруктар, харчынан бириэмийэлэр туттарылыннылар. Кыттааччылар махтанан, үөрэн-көтөн, уопут атастаһан, дуоһуйан тарҕастылар.
Жанна Тумусова.
