Балаҕан ыйын 1 күнүгэр – Билии күнүгэр Социалистическай үлэ Дьоруойа Т.Г. Десяткин аатынан Тумул орто уопсай үөрэхтээһин оскуолатын аана тэлэччи арыллан оҕо-аймах саҥатынан туолла, бастакы чуораан лыҥкыныы чугдаарда. Манна 2023-2024 үөрэх дьылыгар барыта 118 үөрэниэҕэ. Маҥнайгы кылааска 8 оҕо киирэн оскуола боруогун атыллаата, 11-с кылааска 7 оҕо үөрэнэр.
Быйылгы үөрэх дьылыгар оскуола дириэктэринэн Семен Десяткин, дириэктэри үөрэх чааһыгар солбуйааччынан Иннокентий Слепцов, иитии чааһыгар солбуйааччынан Софья Шепелева үлэлэрин саҕалаатылар. Үөрүүлээх чааска улуус физкултуураҕа уонна успуорка управлениетын салайааччыта Алексей Попов, улуустааҕы “Кэскил” оҕону сайыннарар киин дириэктэрэ Матрена Птицына ыҥырыылаах ыалдьыттарынан буоллулар. Суолга сэрэхтээх буолууну хонтуруоллуур сулууспа үлэһиттэрэ кырачааннарга суолга сэрэхтээх буолалларыгар ыҥыран туран сэмэй бэлэхтэрин туттардылар.
Ааспыт үөрэх дьылыгар 8 оҕо оскуоланы бүтэрбит. Ол иһиттэн 1 оҕо кыһыл көмүс мэтээлинэн бүтэрэн Амурдааҕы судаарыстыбаннай мэдиссиинэ академиятыгар киирбит. 3 оҕо Дьокуускайдааҕы финансовай-экэнэмиичэскэй колледж, 1 Бүлүүтээҕи педагогическай, 1 Дьокуускайдааҕы мэдиссиинэ коллеһын устудьуоннарынан буоллулар.
Марелла Баишева.
