Олунньу 3 күнүгэр оройун баһылыгын отчуота Баатара нэһилиэгэр ыытылынна.
Мунньаҕы нэһилиэк баһылыга Дмитрий Акимов ыытта, 60 киһи муһунна. Ааспыт сылга нэһилиэнньэттэн 13 боппуруос турбутуттан 3 хонтуруолга ылыллан үлэҕэ киирбит, 10 боппуруос үөрэтиллэ сылдьар.
Сыымахтар нэһилиэк уопсай кыһалҕатын таарыйар 30-тан тахса ыйытыыны биэрдилэр. Үгүс ыйытыы тыа хаһаайыстыбатын салаатыгар киирдэ: дулҕа ыраастааһыныгар туох үлэ барарын, төһө сыаналааҕын, чааһынай сылгылаах дьоҥҥо судаарыстыба тоҕо көмө көрбөтүн, эко пиэрмэ тутуутугар туох көрдөрүү баарын, сүөһү ахсаанын элбэтэргэ былаан хайдах баран иһэрин туоһуластылар. Биэрбит ыйытыыларга тыа хаһаайыстыба салаатын салайааччыта Иннокентий Семенов хоруйдарыттан, олохтоохтор ордук «Саҥа олох» тэрилтэттэн племенной сүөһү кэлээри турарын сэргии иһиттилэр. Баатаралар чуолаан гаас ситимэ төһө кэминэн тардылларын, суоллара олус кыараҕас буолан суол оҥоһулларын туруорустулар.
Этиилэргэ Өргөннөөххө баар саха ынаҕын хаһаайыстыбатын үүтүн туһаҕа таһааран, дьону эмтиир санаторий-профилакторий баар буолуон баҕаралларын биллэрдилэр. Баатараҕа кадет оскуолатыгар 40 миэстэлээх интэринээт тутулларын туруорустулар. Кырдьаҕастар ааттарыттан Иван Ходулов сахалартан бастакы Сэбиэскэй Сойуус Дьоруойа Ф.К.Попов пааматынньыга боруонсаҕа түһэриллэн төрөөбүт дойдутугар турара буоллар диэн баҕа санаатын тиэртэ. Яков Романов нэһилиэнньэҕэ сахалыы медиа бибилитиэкэ тэрийиэххэ диэн этиитэ бастыҥ үлэһит дьонноох Баатара нэһилиэгэ, олоҕу кытта тэҥҥэ сайдан иһэрин бэлиэтээтэ.
Елизавета Неустроева.
