Сыымахха 273 нүөмэрдээх учаастактааҕы быыбар хамыыһыйатын испииһэгэр 295 киһи киирбититтэн 19 чаастааҕы туругунан 209 киһи куоластаата. Ол туһунан биһиэхэ хамыыһыйа бэрэссэдээтэлэ Надежда Кузьмина иһитиннэрдэ.
Баатара нэһилиэгэр быыбар тэрээһиннээхтик бара турар. Олохтоохтор учаастакка кэлиилэрэ ордук бастакы күн, кулун турар 15 күнүгэр, бу улахан суолталаах быыбары кэтэһэн туран, гражданскай иэстэрин туох-ханнык иннинэ төлүүр санааларыттан, көхтөөх этэ. Нэһилиэк баһылыга Дмитрий Акимов дьонун-сэргэтин көҕүлээн биир бастакынан куоластаабыт.
Сыымах төрүт олохтоохторо Иннокентий Иннокентьевич, Мария Ивановна Корякиннар, уоллара Иван Иннокентьевич кэргэнинээн Любовь Кимовналыын тэрээһиҥҥэ улахан суолта биэрэннэр сахалыы маанытык таҥнан кэлбиттэрэ сонуннук көһүннэ.
Хамыыһыйа бэрэссэдээтэлэ Надежда Николаевна бу икки күн сэттэ ыалга, кырдьаҕастарга дьиэлэригэр тиийэн куоластаппыттарын итиэннэ кэнники кэмҥэ үстүү күн быыбардааһын бары өттүнэн табыгастааҕын бэлиэтээн этэр: “Бастатан туран, куоластыыр дьон бириэмэлэрин аттаран учаастакка кэлэллэригэр, иккис курдук, хамыыһыйалар үлэлэригэр эмиэ ордук, уопсай көрдөрүү да үрдүүр”, — диир.
Февронья Охлопкова.
