Балыктаах бөһүөлэгэр «Сүрэх тыа» түөлбэтин олохтоохторо Евдокия Михайловна, Андрей Васильевич Стручковтар 2001 сыллаахха ыал буолбуттарыгар төрөппүттэрэ икки өттүттэн биирдии оҕолоох ынахтары биэрэннэр хаһаайыстыбаларын тэринэн саҕалаабыттара.
Бастаан эргэ кыра хотоҥҥо кыстаппыттара. Эһиилигэр «Хаххах» сайылыкка тахсан сайылаабыттара, ынахтарын ыан, сэппэрээтэринэн үүттэрин түһэрэн арыы оҥорон, абараат үүттэрин лабыктаны эбэн кыстаппыт сибиинньэлэрин аһаппыттара. Эбии биир биэлэммиттэр уонна көлүүр аттаммыттар. Аҕалара Андрей сайын аайы аймахтарынаан оттуур, атынан мустарар этэ. 2009 сыллаахха кыра кытай тыраактарын ылыммыттара. Андрей Васильевич тиэхиникэҕэ сыстаҕас буолан бэйэтэ оҥостор, сваркалыыр. Бастакы тыраахтарыгар кыра тэлиэгэ оҥорбута. От охсор, сир хорутар фрезанан ситэрэн, көрүнэн-өрөмүөннээн билигин да үлэлэтэ сылдьар. Сылгытын элбэтэн, убаһалары ииттэн, атыыр атыылаһан үөр оҥорон өссө да элбэтэр баҕа санаалаах.
2014 сыллаахха түөлбэтигэр бастакынан сүүрбэттэн тахса сүөһү турар аныгы матырыйаалынан сөптөөх гына былааннаан саҥа хотон туттубута. Ону элбэх киһи сэргээн кэлэн көрөн туһаммыттара. Сүөһүлэрин таһынан куурусса, көҕөн иитэ сылдьыбыттара. 2013 сыллаахха Стручковтар ЮМЗ тыраахтары ылыммыттара, хаһаайын отун-маһын тиэйэригэр абыраммыта. Аны 2023 сыллаахха ЮМЗ тыраахтарын Беларусь тыраахтарга уларытан Андрей Васильевич билигин атын да ыалларга от-мас тиэйиигэр көмөлөһөр. Билигин аҕыс ыанар ынахтаахтар, аппараат ылынан ыан абыранныбыт дииллэр.
Ыал ийэтэ Евдокия Михайловна начаалынай кылаас учууталынан үлэлиир, педыстааһа 34 сыл буолбут. Соторутааҕыта оскуолабыт үбүлүөйүгэр Евдокия Михайловна Баишевтар педагогическай династияларын анал истипиэндьийэтинэн уонна С.Н.Донской аатынан идэни үрдэтэр институт Бочуотунай грамотанан үлэтэ сыаналаммыта. Евдокия Михайловна иллэҥ кэмигэр уһанарын сөбүлүүр. Ол курдук, лобзигынан киһи кэрэхсиир араас оҥоһуктарын оҥорон дьиэтин иһин-таһын тупсарар.
Евдокия Михайловна, Андрей Васильевич түөрт оҕолоохтор. Улахан кыыстара Лена Майаҕа дьиэ-уот тэринэн, түөрт оҕолоох улахан дьиэ кэргэн ийэтэ, кэргэнэ Василий пенсионнай пуонда үлэһитэ. Иккис кыыс Алена Үөһээ Бүлүүгэ оҕо уһуйааныгар, күтүөттэрэ Петр ОДьКХ үлэлиир, икки оҕолоохтор.
Уоллара Вася ‒ устудьуон, кыра кыыс Сандаара 11кылаас үөрэнээччитэ.
Ыал аҕата Андрей Васильевич олохтоох хомунаалынай хаһаайыстыбаҕа 2006 сылтан операторынан үлэлиир. Кини олус үчүгэйдик ыллыыр. «Ситим» эр дьон ансаамбылыгар сылдьар. Култуура уонна успуорт эстэпиэтэтигэр сыл аайы кыттан элбэхтэ лауреат, дипломант буолан нэһилиэгин аатын ааттатар.
Стручковтар аймахтарын кытта үлэҕэ, сынньалаҥ кэмнэрин бииргэ атааралларын сөбүлүүллэр. Бу курдук, Евдокия, Андрей Стручковтар хаһаайыстыбаларын бигэ туруктаан, баҕа санааларын олоххо киллэрэн салгыы чэчирии сайдалларыгар,үлэлэригэр ситиһиини баҕарабыт.
Мария Захарова.
