Кулун турар 12 күнүгэр Хара нэһилиэгин «Айыллаан» култуура киинигэр улуустааҕы «Далбар Хотун» куонкурус ыытылынна. Тэрээһиҥҥэ Мэҥэ Хаҥалас улууһун доруобуйаларынан хааччахтаах дьон уопсастыбаларын 13 кэрэ аҥаара кыттыыны ыллылар.
«Бэйэни билиһиннэрии», «Дьоҕуру көрүү», «Бырааһынньыктааҕы аккырыыкканы оҥоруу», «Кэрэ көстүү» түһүмэхтэргэ Майаттан Марфа Васильева, Заредина Сосина, Ольга Захарова, Луиза Иванова, Хараттан Анастасия Григорьева, Мэлдьэхситтэн Марианна Степанова, Догдоҥоттон Светлана Иванова, Раиса Никифорова, Ороссолуодаттан Акулина Мартынова, Аллараа Бэстээхтэн Зинаида Иванова, Төҥүлүттэн Марианна Софронова, Августа Данилова, 1-кы Тыыллыматтан Светлана Пинигина бэйэлэрин холонон көрдөрдүлэр.
Куонкурус кыттыылаахтарын, көрөөччүлэри улуус баһылыгын бастакы солбуйааччы Василий Михайлов, нэһилиэнньэ социальнай көмүскэллээх буолуутун улуустааҕы кэлим киинин салайааччытын солбуйааччы Мария Федорова, Хара нэһилиэгин баһылыга Дария Назарова, улуустааҕы инбэлииттэр уопсастыбаларын бэрэссэдээтэлэ Тамара Пермякова эҕэрдэлээтилэр. Дьүүллүүр сүбэҕэ улуустааҕы көрбөттөр уопсастыбаларын бэрэссэдээтэлэ Иван Семенов, И.М.Сосин аатынан аатынан улуустааҕы киин бибилэтиэкэ сүрүннүүр бибилэтиэкэрэ Капиталина Игнатьева, бэрэссэдээтэлинэн Тамара Николаевна үлэлээтилэр.
Куонкуруһу «Айыллаан» култуура киинин режиссера Николай Васильев-Айтамыл ииллээн-саҕалаан ыытта, СӨ култууратын туйгуна, киин уус-уран салайааччыта Татьяна Степанова, балетмейстер Мария Романова ырыаларынан киэргэттилэр.
Тэрээһин түмүгүнэн бары кыттааччыларга үөрүүлээх быһыыга-майгыга эҕэрдэ суруктар, сибэкки дьөрбөлөрө туттарылыннылар. Тэрээһин саамай аҕам саастаах кыттааччыта Ольга Захарова «Ытык саас» анал ааты ылла, Зинаида Иванова «Мааны Хотун», Луиза Иванова «Уран Хотун», Акулина Мартынова «Сайдар Хотун», Заредина Сосина «Талба Хотун» ааттарга тигистилэр. Куонкурус кыайыылааҕынан Анастасия Григорьева тахсан «Далбар Хотун» үрдүк аатын ылла.
Тамара Пермякова, улуустааҕы инбэлииттэр уопсастыбаларын бэрэссэдээтэлэ:
– Сылын аайы ыыттыллар «Далбар Хотун» куонкуруска бэйэлэрин холонон көрөөччү ахсаана элбээн иһэрэ олус үөрдэр. Түһүмэхтэргэ бэлэмнэнэн, үөрэн-көтөн, көхтөөхтүк күрэхтэспиттэриттэн санаабыт көтөҕүллүннэ. Бары кыттаачыларга барҕа махталбын тириэрдэбин, кыайыылаахтары эҕэрдэлиибин. Барыларыгар сааскы сандал, сылаас күннэр кэлбиттэринэн, сааскы бырааһынньыктарынан эҕэрдэлээн туран кытаанах, чэгиэн доруобуйаны, дьиэ кэргэннэригэр дьолу-соргуну, ситиһиини баҕарабын.
«Айыллаан» култуура киинин кэлэктиибэ биһиги этиибитин ылынаннар, Хара нэһилиэгин баһылыга Дария Назарова дьонун кытта сүбэлэһэн, биһигини өйөөннөр куонкуруспутун ыытарга күүс-көмө буолбуттарыгар махталбыт улахан, — диэтэ.
– Бүгүн олус үчүгэй тэрээһин буолан ааста, — диэн санаатын «Далбар Хотун» улуустааҕы куонкурус кыайыылааҕа Анастасия Григорьева үллэһиннэ. – Тамара Николаевнаҕа, куонкуруһу тэрийбит бары дьоҥҥо, кыайыыны ситиһэргэ бэлэмнээбит «Айыллаан» култуура киинин үлэһиттэригэр Николай Васильевка, Татьяна Степановаҕа, Мария Романоваҕа уонна доруобуйаларынан хааччахтаах дьон уопсастыбатын бэрэссэдээтэлигэр Любовь Дмитриеваҕа истиҥ махталбын тиэрдэбин. Барыларыгар баҕарыам этэ кытаанах доруобуйаны, күөх халлааны, иллээх-эйэлээх олоҕу, дьолу-соргуну. Маннык тэрээһиинэр өссө буола, кэҥии турдуннар!
Иван Лукин.
