Арассыыйа Бырабыыталыстыбатын 550 №-дээх уурааҕар олоҕуран, туох баар дьиэ кыыла, көтөрө, бэл, тигээйигэ, балыкка тиийэ, эбэһээт бэлиэтэнэн, учуокка туруохтаах.
Ол эбэтэр хас биирдии кыыл туспа нүөмэрдэнэн, «РегАгро» уонна «Хорриот» тиһиктэргэ киириэхтээх. Онно туох баар дааннайа барыта киирэр, ол эбэтэр: кыыл боруодата, дьүһүнэ, сааһа, аата, хаһаайына, ханна иитиллэн турара, кэлиитэ-барыыта, тугунан, хаһан, хаста ыалдьыбыта, тугунан эмтэммитэ, ханнык вакциналары ылбыта, о.д.а.
Елизанна Алексеева, улуустааҕы бэтэринээринэй управление сүрүннүүр исписэлииһэ:
– Улууспут үрдүнэн бүгүҥҥү күннээҕи туругунан 16470 ынах сүөһү, 13749 сылгы, 42 сибинньэ, 41 коза, 1629 дьиэ көтөрө регистрацияламмыта. Күн бүгүн сылгыга чииптээһин үлэтэ ситэ илик, өссө да 11 нэһилиэккэ 652 сылгы чииптэммэккэ турар.
2025 сыл кулун тутар 1 күнүгэр диэри сылгыны чииптээһин барыта бүтүөхтээх. Сылгыларын чииптэппэтэх дьон административнай миэрэҕэ тардыллалларын, ол эбэтэр ыстарааптаныахтарын уонна сааҥсыйаҕа тардыллыахтарын сөбүн туһунан санатабыт. Уурааҕы иккистээн кэһии түбэлтэтигэр миэрэ күүһүрэр.
Сылгыларын бэлиэтэтэ илик дьон истиитигэр, өссө да бириэмэ баарынан туһанан, бу бүтэһик нэдиэлэҕэ кытаатан чииптэтиҥ, – диэн иһитиннэрдэ.
Иван Лукин.
