Майаҕа тохсунньу 28 күнүгэр Д.Ф.Ходулов аатынан култуура киинигэр Мэҥэ Хаҥалас улууһугар тыа хаһаайыстыбатын иккис сылын түмүгүнэн төрүт дьарыкпытын сайыннарар, эмис эти, үрүҥ илгэни дэлэтэр тыа сирин үлэһит дьонун ортотугар сыл бастыҥнарын бэлиэтиир дьоро күн буолла.
Тыа хаһаайыстыбатын управлениетын салайааччы Иннокентий Семенов 2023-2025 сс. тыа хаһаайыстыбатын сайыннарыы хайысхаларын, 2024 с. олоххо киллэрии хаамыытын туһунан видео-матырыйаалынан улахан экрааҥҥа сырдатта.
Үөрүүлээх тэрээһин кыттыылаахтарын улуус баһылыга Дмитрий Тихонов эҕэрдэлээтэ итиэннэ бастыҥ үлэлээхтэргэ наҕараадалары туттарда. “Өрөспүүбүлүкэ социальнай-экэнэмиичэскэй сайдыытыгар өҥөлөрүн иһин” Бырабыыталыстыба бэрэссэдээтэлин грамотатынан Тумултан Николай Эверстов, Төҥүлүттэн Екатерина Михайлова, “Улуус социальнай-экэнэмиичэскэй сайдыытыгар кылааттарын иһин” баһылык грамотатынан уонна сыаналаах бэлэҕинэн “Хоту” ТХПК сүрүн буҕаалтыра Анна Баишева, түөскэ кэтэр бэлиэнэн “Хоту” ТХПК бэрэссэдээтэлин солбуйааччы Матрена Неустроева, “Тыа хаһаайыстыбатын сайдыытыгар кылааттарын иһин” түөскэ кэтэр бэлиэнэн Табаҕаттан Вера Винокурова, Чыамайыкыттан Юрий Дьячковскай, Ороссолуодаттан Екатерина Игнатьева, Сыымахтан Октябрина Тастыгина, Тумултан Зинаида Толстякова, Павловскайтан Анна Туприна, “Хоту” ТХПК ас кэмбинээтин маастара Екатерина Федорова, маны сэргэ, элбэх үлэһит дьаһалта грамотатынан, баһылык махтал суругунан наҕараадаланнылар.
Ил Түмэн Судаарыстыбаннай Мунньах дьокутааттара Андрей Находкин, Тихон Скрябин, улуус дьокутааттарын сэбиэтин бэрэссэдээтэлэ Иннокентий Андросов, СӨ Тыатын хаһаайыстыбатын уонна ас-үөл бэлиитикэтин министиэристибэтин үүнээйигэ, сир салааларыгар департаменын салайааччыта Вячеслав Гаврильев, “Сахаагроплем” судаарыстыбаннай тэрилтэ салайааччыта Алексей Жирков, о.д.а. эҕэрдэлээтилэр, наҕараадалары туттардылар.
Тэрээһин чэрчитинэн, тыа хаһаайыстыбатын салалтатын көҕүлээһининэн, тыа хаһаайыстыбатын салааларыгар үлэлии сылдьар байыаннай дьайыы кыттыылаахтарын дьиэ кэргэннэригэр көмөлөһөр сыаллаах сүүйүүлээх оонньуу ыытылынна.
Улууска ыытыллыбыт тыа хаһаайыстыбатын салаатыгар үлэҕэ куоталаһыы түмүгүнэн кыайыылаахтар ааттаннылар.
2024 с. түмүгүнэн 456 туонна үүтү туттаран Табаҕаттан бааһынай хаһаайыстыба салайааччыта Христина Герасимова “Үүтү туттарыыга бастыҥ хаһаайыстыба”, 300 хонук иһигэр ортотунан биир сүөһүнү 220-225 киилэҕэ диэри төлөһүтэн Марианна Зыкова бэрэссэдээтэллээх “Суола” ТХПК “Ньирэй төлөһүтүүгэ бастыҥ хаһаайыстыба”, биир фуражнай ынахтан 3983 киилэ үүтү ыан, “Хоту” ТХПК 27 туонна 881 киилэ үүтү туттаран Төҥүлүттэн Иннокентий Федотов “Улуус бастыҥ ыанньыксыта”, кураан дьылга биир гектартан ортотунан 10,32 сэнтиниэри, уопсайа 419 гектар бааһына сириттэн 432 туонна бурдугу ылары ситиһэн бааһынай хаһаайыстыба салайааччыта Төхтүртэн Аркадий Попов “Туорахтаах култууралары үүннэриигэ бастыҥ хаһаайыстыба”, 430 ынах сүөһү кыстыгар уопсайа 964 туонна оту, күөх маассаны, 372 туонна сиилэһи бэлэмнээн Таисия Десяткина салайааччылаах “Тумул” кэпэрэтиип, сүөһүтүн, сылгытын төрүөҕүн сыллата 100 бырыһыан ылары ситиһэн, үүтүн былаанын 130 бырыһыан толорон Балыктаахтан Илья, Христина Мохначевскайдар бааһынай хаһаайыстыба “Бастыҥ бааһынай хаһаайыстыбалаах дьиэ кэргэн”, сылгы уопсай ахсаана эбиллиитин 128 бырыһыаҥҥа, сылгыны тыыннаахтыы иитиини 100 бырыһыаҥҥа тиэрдэн Табаҕаттан Кирсан Петров “Улуус бастыҥ сылгыһыта” үрдүк ааттарынан бэлиэтэннилэр.
“Бастыҥ осеменатор” ааты 409 ынах 100 бырыһыан ууланыыларын, ньирэй тыыннаахтыы төрүөҕүн 100 бырыһыан ылары ситиспит “Хорообут” ХЭТ сиэмэһитэ Михаил Егоров, “Бастыҥ оҕуруотчут” аатын хаппыыста үүнүүтүн 1 гектар сиртэн 200 сэнтиниэри, хортуоппуйу 21 гектар сиртэн 210 туоннаны хомуйан, орто үүнүүнү 1 гектартан 100 сэнтиниэргэ тиэрдэн Павловскайтан Власий Петров, “Бастыҥ үүт тутааччы” ааты соҕотуопка былааннаммыт сорудаҕын 100 бырыһыан толорон, тутуллубут үүт кэмигэр 100 бырыһыан “Меркурий” бырагыраамаҕа хабыллыытын хааччыйан Хаптаҕайтан үүт тутааччы Елена Дмитриева, “Бастыҥ соҕотуопкалыыр тэрилтэ” үлэһитэ ааты үүт кэмбинээтэ уонна буойуна тэриллэрэ аккаастаабакка үлэлииллэрин хааччыйар “Хоту” ТХПК наладчик-эпэрээтэрэ Николай Федотов, “Бастыҥ бэтэринээр” ааты сэрэтэр-чинчийэр үлэ былаанын, эмтээһин көдьүүһүн үрдэтэн, сүөһүнү, сылгыны маркировкалааһыны, учуокка ылыыны 100 бырыһыаҥҥа тиэрдэн Павловскайтан бэтэринээр учаастагын сэбиэдиссэйэ Екатерина Евсеева, “Бастыҥ суот-учуот үлэһитэ” ааты бу эйгэҕэ 23-с сылын үтүө суобастаахтык үлэлиир “Чүүйэ” МУТ сүрүн буҕаалтыра Светлана Алексеева, “Тыа хаһаайыстыбатын бастыҥ исписэлииһэ” ааты отчуоттары кэмигэр хаачыстыбалаахтык туттаран, судаарыстыба сорудахтарын ынах сүөһүгэ уонна сылгыга 105 бырыһыан толортоон Тараттан тыа хаһаайыстыбатын исписэлииһэ Мария Стручкова, “Тыа хаһаайыстыбатын тэрилтэлэригэр бастыҥ кураатар” ааты барыта 12 тыа хаһаайыстыбатын тэрилтэлэригэр кураатардыыр, элбэх уопсай үлэлэри тэрийэр улуус дьаһалтатын боропсойууһун бэрэссэдээтэлэ Майя Эверстова ылан наҕараадалары туттулар.
Сыл бастыҥнарын чиэстиир тэрээһини ырыаларынан-тойуктарынан Саха Өрөспүүбүлүкэтин норуодунай артыыһа Аскалон Павлов, ырыаһыттар Сардаана Трофимова-Көмүс, Виталий Очиров уонна “Дьиэрэй” фольклор ансаамбыла эҕэрдэлээтилэр.
Төрүт аһылыгы дэлэтэргэ күннэтэ ылсан үлэлиир туруу үлэһит дьоммутугар чиргэл доруобуйаны, дьиэ кэргэттэригэр этэҥҥэ буолууну, дьоллоох-соргулаах олоҕу баҕарабыт.
Марелла Баишева.
