Кыһыҥҥы хараҥа күннэр халбарыйан, сааскы күн сылааһынан сыламнаан, таһырдьа тахсыбыт сүөһүлэр көччүйбэхтии түһэр кэтэспит кэрэ кэмнэрэ кэллэ. Улууска тыа хаһаайыстыбатын иккис сыла. Судаарыстыбаҕа туттарыллар аһы-үөлү оҥорууга сэмэй кылааттарын киллэрсэн быһаччы үлэлии сылдьар, сүөһүнү, сылгыны таптаан иитэр дьонноохпут тухары бэйэбит төрүт аспыт быстыа суоҕар эрэллээхпит.
Төҥүлү Бэрдьигэстээҕэр Артем Борисов бааһынай хаһаайыстыбатыгар үлэ тигинэччи барар. Манна икки хотонунан 24 ыанар ынах, 1 улахан оҕус, 1 тыһы, 2 оҕус тиҥэһэлэр, 17 борооску кыстыгы туораан эрэллэр. От-мас тиийэр. Билигин 12 ынах төрөөн турар, ньирэйдэрэ бары этэҥҥэлэр. Быйыл үүккэ 60 туонна дуогабардаахтар. Ынахтар эргиччи ойбоҥҥо, онтон төрөөбүт ынахтары кытта борооскулар дьиэҕэ уулууллар. Маны сэргэ, 10-ча сылгылаахтар, 5 сибиинньэ иитэллэр. Хаһаайын барытын толору хааччыйар: ынах сүөһүгэ комбикорм, сылгыга эбиэс баар, хотоҥҥо 4 туонналаах систиэринэҕэ ууну куттараллар. Манна сүрүннээн Артем Иванович таайа Еремей Баишев, доҕотторо Лука Попов, Прокопий Говоров үлэлииллэр. Майаттан күтүөтэ Валерий Романов кэлэ-бара, уһун өрөбүл кэмигэр оҕолор тахсан көмөлөһөллөр.
Улахан дьиэ кэргэн ийэтэ Федосия Анатольевна бэһис оҕотун көрөн олордор да, аһылык арааһын астаан үлэһиттэрин хадаҕалыырын сөбүлүүр. Кини сахалыы сиэринэн-туомунан сирин-дойдутун, хотонун, тэлгэһэтин алгыстаах алаадьынан айах тутан маанылыыр үгэһин тута сылдьар далбар буолар.
А.И.Борисов ыанар ынаҕын ахсаанын элбэтэр баҕалаах да, сайынын оттуур сирэ тиийбэтэ атахтыыр, дьон сирин эттэһэн оттуур ороскуота улахан. Күһүн ходуһа сирин бэлэмнээн дулҕаны астаран, ыраастатар үлэни ыытар. Быйыл сайын Хаатааны диэн алааһы күрүөлүүр, Төҥүлүгэ эккэ улаатар оҕустары иитэргэ дьоҕус хотон тутар былааннардаах.
Үлэ дьоно сынньалаҥ кэмнэрин туһалаахтык атааралларыгар вай-фай сибээс, тэлэбиисэр баар, улуустарын “Эркээйи” хаһыатын сурутан көтүппэккэ ааҕаллар.
Сайаҕас, үтүө санаалаах туруу үлэһит дьоҥҥо чөл куттаах чэгиэн туругу, үлэттэн дуоһуйууну, олохтон үөрүүнү сомсоллоругар баҕарабын.
Марелла Баишева.
