Дьокуускай куоракка Петр Егоров аатынан баянистар, аккордеонистар, домраҕа, гитараҕа уонна балалайкаҕа оонньооччулар «Сулустар парааттара» диэн өрөспүүбүлүкэтээҕи күрэстэрэ буолан ааста. Куонкуруска уопсайа 86 үөрэнээччи кыттыыны ылла.
Баянистар, аккордеонистар хайысхаларыгар 36 үөрэнээччи толоруутун Саха Өрөспүүбүлүкэтин култууратын үтүөлээх үлэһитэ Раиса Крылова, Саха Өрөспүүбүлүкэтин култууратын туйгуна Андрей Псарев, Хатастааҕы оҕо ускуустубатын оскуолатын эдэр педагога Дьулус Васильев састааптаах сүбэ дьүүллээтэ.
Куонкуруска М.К.Попова аатынан Майатааҕы оҕо ускуустубатын оскуолатын үөрэнээччилэрэ ситиһиилээхтик кытыннылар. Алын кылаастар бөлөхтөрүгэр баян кылааһын преподавателэ Данил Алексеев үөрэнээччилэрэ: Алгыс Иванов 2-с истиэпэннээх лауреат, Артем Васильев 1-кы истиэпэннээх дипломант, Антон Голиков 2-с истиэпэннээх дипломант аатын ыллылар.
Оскуола Аллараа Бэстээхтээҕи филиалын Дария Черноброва салайар аккордеон кылааһын үөрэнээччилэрэ: орто саастаахтар бөлөхтөрүгэр Стас Титов 1-кы истиэпэннээх лауреат, Сергей Стручков 3-с истиэпэннээх лауреат, Сулустаан Соколов 2-с истиэпэннээх дипломант уонна үрдүкү кылаас оҕолорун бөлөҕөр Настя Мординова 2-с истиэпэннээх лауреат буоллулар.
Үөрэнээччилэри үрдүк ситиһиилэринэн эҕэрдэлиибит!
