Олунньу 27 кунугэр Аллараа Бэстээххэ Р.И. Брызгалов аатынан Тырааныспар техникумугар Бүтүн Арассыыйатааҕы инбэлииттэр уопсастыбаларын өрөспүүбүлүкэтээҕи салаатын көҕүлээһининэн, Мэҥэ Хаҥаластааҕы нэһилиэнньэ көмүскэллээх буолуутун кэлим киинин тэрийиитинэн социальнай десант кэлэн үлэлээн барда.
СӨ киһи быраабын көмүскүүр аппаратын ыстаарсай референэ Георгий Пономарев, СӨ медик-социальнай экспертиза кылаабынай-экспертэ Лена Лазарева, СӨ социальнай пуондатын социальнай бырайыактарга салаатын салайааччыта Наталья Протопопова, СӨ үлэлээх буолууга кэмитиэтин үлэлээх буолуу бэлиитикэтигэр уонна судаарыстыбаннай хонтуруолна салаатын салайааччыта Марианна Заровняева, «Аҕа дойдуну көмүскээччилэр» эригийиэннээҕи салаатын Мэҥэ Хаҥаласка социальнай сүрүннээччитэ Елена Аммосова десант састаабыгар киирэннэр дьону биирдиилээн көрсөн кэпсэттилэр, сүбэ-ама биэрдилэр.
Ону тэҥэ улуус баһылыгын социальнай боппуруостарга уонна имиджевэй бэлиитикэҕэ солбуйааччы Татьяна Егорова, нэһилиэнньэ көмүскэллээх буолуутун кэлим киинин дьиэ кэргэни социальнай реабилитациялааһыҥҥа уонна өйөбүлгэ салаатын сэбиэдиссэйэ Лилия Расторгуева дьоҕус реабилитациялыыр киин доруобуйаларынан хааччахтаах дьону кытары үлэтин туһунан, киин кылаабынай эксперт исписэлииһэ Александра Афанасьева техническэй тэриллэри уларсыкка биэрии пуунун уонна сытар дьону көрүү-истии оскуолатын туһунан,
уйулҕа-медик-социальнай арыаллааһын «Кэскил» киинин дириэктэрэ Матрена Птицына улууска доруобуйаларынан хааччахтаах оҕолору уонна дьиэ кэргэни кытта барар үлэни сырдаттылар.
Бу күн тэрээһиҥҥэ барыта 116 киһи кыттыыны ылла. Ону таһынан Горнай, Нам, Таатта, Дьокуускай, Нерюнгри, Хаҥалас, Алдан, Уус Алдан, Амма улуустарыттан инбэлииттэр уопсастыбаларын бэрэссэдээтэллэрэ бэйэлэрин дьоннорун илдьэ кэлэн көрөн-истэн, санаа атастаһан бардылар. Амма улууһун дэлэгээссийэтин баһылыгы социальнай боппуруостарга солбуйааччы Нюргуйаана Илларионова илдьэ кэлэн, тэрээһиҥҥэ толору сылдьан таһымы үрдэттэ.
88 киһи салайааччыларга биирдиилээн киирэн көрсөн, боппуруостарыгар сиһилии хоруйу ылан, астынан тарҕастылар.
Социальнай десант кыттыылаахтара көдьүүстээх үлэ барарыгар былаас араас таһымыгар инбэлииттэр уопсастыбаларын кытта бииргэ үлэлэһии суолталааҕын бэлиэтээн туран, үлэни күүһүрдүүнү, аһаҕас буолууну, биир кэлим сыһыаны олохтооһуну туруорсан туран, улуустары, тэрилтэлэри кытары бииргэ үлэлээһин дуогабарын түһэрсии барылын оҥорон олоххо киллэрэр наадатын ыйдылар.
Тэрээһин хамаандалар икки ардыларыгар дартс, «корнхол», «матрешки», «кульбитто» остуол оонньууларыгар доҕордуу көрсүһүүнэн түмүктэннэ. Күрэхтэһии түмүгүнэн бастакы миэстэҕэ Горнай, иккискэ Майа группордарын, үһүскэ Уус Алдан хамаандалара тигистилэр.
Тэрээһин кыттыылаахтара Иннокентий Оконешников салайааччылаах Аллараа Бэстээхтээҕи Р.И.Брызгалов аатына Тырааныспар техникумугар, тэрээһини ыытыыга көмө буолбут Анна Неустроеваҕа, Дьулустаан Аргуновка, волонтер уолаттарга, остолобуой улэһиттэригэр махталларын биллэрэллэр.
