Кулун тутар 25-26 күннэригэр Сочи куоракка оҕолорго уонна улахан дьоҥҥо ыытыллыбыт Норуоттар икки ардыларынааҕы «Кавказ куубага» грант куонкурус-бэстибээлигэр В.П.Ларионов аатынан Майа орто оскуолатыттан “Алаас симэхтэрэ” муода-устуудьуйа оҕолоро баран ситиһиилээхтик кытыннылар.
Наталья Ефремова салайааччылаах 4-с “а” кылаас оҕолоро үөрэхтэрин таһынан үҥкүүгэ Лидия Артемьеваҕа, муода устуудьуйатыгар Мария Соловьеваҕа уһуйуллаллар.
«Кавказ куубага» куонкурус-бэстибээлгэ Айсаана Гаврильева, Арсен Забровскай, Каролина Никифорова, Настя Павлова, Эрсан Парников, Алеша Пряздников, Алена Саввина, Костя Слепцов, Сайаан Федотов, Вика Яковлева, 6-с кылаастан Павлик Билюкин “Олоҥхо дойдута» кэллиэксийэнэн кыттан аан дойду барҕа баайынан буолбут олоҥхобут дьоруойдарын көстүүмнэрин киэҥ араҥаҕа көрдөрдүлэр. Манна оҕолорбут Кылаан Чыпчаал кыайыылаахтарынан буолары ситиһэн харчынан бирииһинэн, куубагынан, мэтээллэринэн наҕараадаланнылар.
Кинилэри сэргэ, В.П.Ларионов аатынан орто оскуолаттан Лидия Артемьева салайааччылаах “Тускул” ансаамбыл, бу оскуола фольклорга уһуйааччыта Валентина Кривошапкинаҕа уһуйуллан Догдоҥо орто оскуолатын 4-с кылааһын үөрэнээччитэ Айхал Кривогорницын “Хомуска айымньынан”, Елена Потапова, Лидия Артемьева салайааччылардаах Догдоҥо орто оскуолатыттан 1-кы кылаас үөрэнээччитэ Мичийэ Скрябина “Норуот үҥкүүтэ” анал ааттаах куонкурустарга кыттан 1-кы истиэпэннээх лауреаттарынан буоллулар.
Оҕолор уһун өрөбүллэрин туһанан Сочи куорат устун сынньана, күүлэйдии хаалбыттар, бассыайыҥҥа сөтүөлээн үөрбүттэр-көппүттэр. 4-с кылаас төрөппүттэрэ Гелена Григорьева уонна Софья Левина оҕолору көрөн-истэн арыаллаан сылдьаллар.
Сочи куоракка ыытыллыбыт норуоттар икки ардыларынааҕы улахан таһымнаах, элбэх кыттааччылаах куонкурус-бэстибээлгэ үрдүк ситиһиилээхтик кыттыбыт оҕолорбутун, кинилэр төрөппүттэрин, салайааччыларын истиҥник эҕэрдэлиибит.
Марелла Баишева.
