Аҕа дойду Дьоруойдарын күннэрэ
Аҕа дойду Дьоруойдарын дэкээдэтин чэрчитинэн уонна киэн туттар биир дойдулаахпыт Сэбиэскэй Сойуус Дьоруойа Ф.К.Попов төрөөбүт күнүн көрсө Мэҥэ Хаҥалас улууһун оскуолаларын патриотическай кулууптарын ортолоругар “Снежный барс” байыаннай-спортивнай оонньуулар ыытылыннылар.
Эдэр армеецтэр хамаанданан уонна биирдиилээн бастыыр иһин строевой хаамыыга, Калашников аптамаатын бириэмэҕэ ыһыыга-хомуйууга, маҕаһыынын буулдьанан түргэнник иитиигэ, салгын саатынан бэргэнник ытыыга, гимнастическай турникка комплекстары оҥорууга, военизированнай эстэпиэтэҕэ уонна Аҕа дойду устуоруйатын тургутууга күрэхтэстилэр. Байыаннай-спортивнай оонньуулар үөрэнээччилэри төрөөбүт дойдуга бэриниилээх буолууга иитэр-үөрэтэр сыаллаах-соруктаах сүрүн тэрээһин.
Ахсынньы 6 күнүгэр Дмитрий Таас аатынан Хорообут орто оскуолатыгар иккис бөлөххө “Снежный барс” күрэхтэһиитэ буолан ааста. Барыта 5 оскуола байыаннай-патриотическай кулууптарын хамаандалара күөн көрүстүлэр: И.И.Платонов аатынан Наахара, К.О.Гаврилов аатынан Бүтэйдээх, Г.И.Соловьев аатынан Ороссолуода, Т.Г.Десяткин аатынан Тумул уонна олохтоох Хорообут орто оскуолалара.
Тэрээһин үөрүүлээх аһыллыытыгар күрэхтэһии кыттыылаахтарын Хорообут нэһилиэгин баһылыга Гаврил Бродников, бэтэрээннэр сэбиэттэрин аатыттан Наталья Борисова эҕэрдэлээтилэр. Киэн туттар биир дойдулаахпыт Федор Попов холобуругар эдэр кэскиллээх көлүөнэ төрөөбүт дойдуларыгар бэриниилээх буола улааталларыгар баҕа санааларын эттилэр. Байыаннай-спортивнай оонньуулар күрэхтэһиилэригэр уонна куонкурустарыгар бары хамаандалар кыайыыга дьулуурдарын көрдөрдүлэр. Уопсай түмүк кыайыылаахтарынан Бүтэйдээх орто оскуолатын “Хоһуун” патриотическай кулууп хамаандата (сал. Н.Н.Семенов) буолары ситистэ. Иккискэ Хорообут оскуолатын “Юный патриот” патриотическай кулууп хамаандата (сал. Н.П.Андреев), үһүс миэстэҕэ Наахара орто оскуолатын “Эрэл” патриотическай кулууп хамаандата (сал. П.В.Васильев) буоллулар.
Ахсынньы 7 күнүгэр В.П.Ларионов аатынан Майа орто оскуолатыгар бастакы бөлөх оскуолалар ортолоругар күрэхтэһии буолан ааста. Барыта 8 оскуола байыаннай-патриотическай кулууптара кытыннылар: Ф.К.Попов аатынан Баатара, М.Е.Попов аатынан Аллараа Бэстээх, Аллараа Бэстээх 2 №, В.Н.Оконешников аатынан Павловскай, А.С.Шахурдин аатынан Төҥүлү, И.Г.Игнатьев аатынан Хара, И.Г.Тимофеев аатынан Майатааҕы лиссиэй уонна В.П.Ларионов аатынан Майа орто оскуолалара.
Патриотическай тэрээһин бочуоттаах ыалдьыттарынан байыаннай дьайыы кыттыылаахтара прапорщик Гаян Харлампьев уонна сержант, десантнай-штурмовой бөлөх хамандыыра Николай Кузьмин буоллулар. Николай Валерьевич күрэхтэһиини судьуйаласта, Гаян Александрович Аллараа Бэстээх орто оскуолатын ОБЗР учуутала буоларынан үөрэнээччилэрин хамаандатын кытыннарда. Бары юнармеецтар үчүгэй бэлэмнээх кэлэннэр күрэхтэһии тыҥааһыннаахтык барда. Түмүккэ кыайыылаахтарынан Аллараа Бэстээх 2 №-дээх орто оскуолатын “Факел” патриотическай кулууп хамаандата (сал. А.А.Нестерев) буолары ситистэ. Иккискэ Баатара оскуолатын “Кадеты” патриотическай кулууп хамаандата (сал. А.Е.Сосин), үһүскэ В.П.Ларионов аатынан Майа орто оскуолатын “Беркут” патриотическай кулууп хамаандата (сал. Н.Л.Борисов) буоллулар.
“Снежный барс” байыаннай-спортивнай оонньуулар бөлөхтөргө кыайыылаахтара, үөрэнээччилэр уонна хамаанда салайааччылара улуустааҕы үөрэх салалтатыттан дипломнарынан, мэтээллэринэн наҕараадалыннылар. Бастакы бөлөх кыайыылаахтара “Доблесть” Мэҥэ Хаҥалас улууһун бойобуой дьайыылар бэтэрээннэрин уопсастыбаларын ааттыттан сыаналаах каарталары, бары кыттааччы оҕолор Саҥа дьыллааҕы минньигэстэри туттулар. Бастакы уонна иккис бөлөххө кыайыылаах тахсыбыт байыаннай-патриотическай кулууп хамаандалара кэлэр 2025 сыл олунньутугар улуустааҕы финалга кыттыахтара.
Николай Тарасов, улуустааҕы үөрэх салалтатын кылаабынай исписэлииһэ, күрэхтэһиини тэрийээччитэ.
