Матта оскуолатыгар “Олох үөрэҕэ” этнопедагогика киинин кытта үлэлиир «Ситим» эбээлэр түмсүүлэрэ ыалдьыттаата.
Биһиги «Тирэх» эко лабораториябыт үлэтин өссө дириҥэтэн, эбээлэрбитин кытта ситимнээн бардылар. Эльвира Семеновна бэйэтин холобурунан саха дьиэ кэргэнэ хайдах буолуохтааҕын кэпсээтэ. Онтон Ирина Гаврильевна «Сайыына» үөрэҕиттэн сахалыы өйдөбүллэри киһиэхэ олус тиийимтиэ гына тириэртэ. Раиса Валентиновна Үһүс көлүөнэ оскуолатыгар баайыы куруһуогар уолаттарга аналлаах харысхал оҥороллорун туһунан кэпсээтэ, бүгүҥҥү күҥҥэ 3 тыһыынчаттан тахса харысхал оҥоһуллубут. Ону илдьэ сылдьар уолаттар дьиктитик быыһаммыт түбэлтэлэрин кэпсээтэ. Биһиги оскуоланы бүтэрэр уолаттарбытыгар харысхал бэлэхтээн олус долгуйдубут.
Эбээлэрбит ситимнэһэн, аны мантан ыла оскуола, уһуйаан тула бииргэ үлэлиэх буолан тарҕастылар. Онтон истэ кэлбит эдэр төрөппүттэрбит сүбэлэри-соргулары истэн олус астыммыттар. Эбиэт кэннэ балаҕаҥҥа тиийэн үгэскэ кубулуйбут тохсунньу ый сиэрин-туомун тутуһан алҕанныбыт, ыраастанныбыт.
Сахалыы эйгэни тэрийии, сиэргэ-майгыга иитии биһиги сүрүн үлэбит буолар. Билиҥҥи уустук кэмҥэ маннык хайысхалаах тэрээһиннэр ыытыллаллара олус кэрэхсэбиллээх дии санаатыбыт.
Вероника Александрова, Мария Макарова,
Матта орто оскуолата.
