Сэтинньи 1 күнүгэр Илин эҥэр улуустар куубактарын иһин хараҕынан көрбөттөр уопсастыбаларын икки ардыгар үгэс буолбут голболга күрэхтэһии Амма улууһун Бөтүҥ нэһилиэгэр буолан ааста. Манна быйыл түөрт улуус хамаандалара кытыннылар: Мэҥэ Хаҥалас, Амма, Чурапчы, Таатта.
Мэҥэ Хаҥалас улууһун хараҕынан көрбөттөр хамаандатын уопсастыба бэрэссэдээтэлэ Иван Семенов салайан илдьэ сырытта. Хамаандаҕа кинини сэргэ Игорь Захаров, Мирослав Ермолаев, Александра Рожина, Елизавета Иванова, Марианна Софронова, Александра Назарова киирэн кытыннылар.
Күрэхтэһии түмүгүнэн эр дьоҥҥо Мэҥэ Хаҥалас улууһун хамаандата бастакы, Амма иккис, Чурапчы улууһун хамаандата үһүс, дьахталларга Амма хамаандата бастакы, Таатта улууһун хамаандата иккис уонна Чурапчы улууһун хамаандата үһүс бириистээх миэстэлэри хааччыннылар.
Уопсай түмүккэ иккис төгүлүн субуруччу бастакы миэстэҕэ тахсан Амма улууһа куубак хаһаайынынан буолла, Мэҥэ Хаҥалас иккис, Чурапчы үһүс миэстэлэр буоллулар. Кыайыылаахтар өрөспүүбүлүкэтээҕи адаптивнай успуорт киинин мэтээллэринэн, грамоталарынан наҕараадаланнылар.
Биһиги улуустан Игорь Захаров (Чүүйэ) “Бастыҥ оонньооччу” анал бирииһи тутта. Амма улууһа турниры үрдүк таһымнаахтык уонна чиэһинэйдик тэрийэн ыыппыттарыгар күрэхтэһээччилэр махтанан тарҕастылар.
Улууспут хамаандатын ситиһиилээхтик кыттыбыттарынан эҕэрдэлиибит!
Марелла Баишева.
