Алдаҥҥа бастакынан кыһыл көмүһү булбут дьонунан оробуочай, хомуньуус, латыш омук Вольдемар Бертин уонна баартыйата суох, булчут саха киһитэ Михаил Тарабукин буолаллар. Кинилэр чиэстэригэр тыа хаһаайыстыбатынан дьарыктанар Мэҥэ Хаҥалас уонна көмүстээх Алдан улуустарын “Сиэрпэ уонна Өтүйэ” доҕордоһуулара төрүттэммит.
Алтынньы 29-31 күннэригэр Дьабыыл нэһилиэгэр ураты суолталаах кэрэ-бэлиэ күннэр буолан аастылар. “Сиэрпэ уонна Өтүйэ” доҕордоһууларын чэрчитинэн, Василий Петров дириэктэрдээх чекист Н.В.Петров аатынан Дьабыыл орто агро хайысхалаах оскуолатын көҕүлээһининэн Томмот куорат 6-с нүөмэрдээх орто оскуолатыттан уонна Алдан улууһун Ленинскэй бөһүөлэгиттэн холбоон 14 эдэр армеецтар ыалдьыттаатылар.
Кинилэри Томмоттон 6-с нүөмэрдээх орто оскуола дириэктэрэ Геннадий Мулдуянов, физкултуура учуутала Матвей Елистратов, Алдантан физкултуура учуутала Артем Чеботарь, эбии үөрэхтээһин педагога, 5-с нүөмэрдээх оскуола эдэр армеецтарын этэрээтин салайааччыта Сергей Сафронов, учуутал Игорь Вахрушев, есаул Георгий Николайчук, о.д.а. арыаллаан аҕалбыттар, оҕолор этэҥҥэ сылдьалларыгар эппиэтинэһи сүкпүттэр.
Ыччаты патриотическай тыыҥҥа иитэр суолталаах тэрээһин Норуоттар сомоҕолоһууларын күнүн көрсө итиэннэ оскуола оҕолорун уһун өрөбүллэрин туһалаахтык атааралларын туһугар былааннанан ыытыллыбыт.
Ыраахтан кэлбит ыалдьыттарынан эдэр армеецтар Томмоттон 5-с “а” кылаастан Ратмир Солкин, 6-с “а” кылаастан Андрей Журавлев, Тимофей Негрич, Николай Таюрскай, Максим Яковлев, 7-с кылаастан Константин Белехов, Дмитрий Леонтьев, Егор Пушмин, 8-с кылаастан Артем Котельников уонна Ленинскэй бөһүөлэгиттэн кэлбит Степан Донченко, Тимофей Рогодзинскай, Дмитрий Чекан, Матвей Колпаков, Константин Решетников буоллулар.
“Дьабыыл кэскилэ” хамсааһын көхтөөх үөрэнээччилэрэ, олохтоох дьон сиэринэн уруулу бэйэлэрин илиилэригэр ылан, билсиһии киэһэтин сэргэхтик ыыттылар. Оҕолор ыстаансыйаларынан “Бииргэ – хамаанданан” (“Вместе – мы команда”) оонньууну көҕүлүттэн ыллылар. Иккис күн олохтоох дьаһалта ыалдьыттары ыҥыран минньигэс балыктааҕынан аатырар Арыылаах Эбэҕэ муҥхаҕа сырытыннарда. Дьабыыл агро оскуолатын үөрэнээччилэрэ сыллата уһун өрөбүллэригэр нэһилиэк муҥхатыгар сылдьан өбүгэ үтүө үгэстэригэр уһуйуллаллар. Онон бу билиилэрин ыалдьыттарыгар көрдөрөн, ыкса билсэр түгэни мүлчү туппатылар. Оҕолор хардарыта уопут атастастылар, оскуолаларын устуоруйатыттан үллэһиннилэр.
Киэһэ өттүгэр байыаннай-патриотическай иитиигэ бэлэмнэрин, сатабылларын көрдөрдүлэр. Байыаннай кэм ырыатынан стройдаан хаамыыттан саҕалаан, аптамааты ыһыыга, хомуйууга бириэмэҕэ күрэхтэстилэр. Икки өттүттэн булкаастаах хамаандалары туруоран «Лазертак» оонньууга оонньоотулар. Оҕолор бэйэ-бэйэлэриттэн элбэххэ үөрэннилэр, доҕордуу сыһыан олохтонон үөрдүлэр, астыннылар.
Үһүс түмүктүүр күҥҥэ олохтоохтор уонна ыалдьыттар өрө көтөҕүллэн, бэйэ-бэйэлэригэр махталларын бэлиэтин наҕараадалары уонна өйдөбүнньүк бэлэхтэри туттарыстылар.
Тэрийээччилэр оҕолорго истиҥ-иһирэх билсиһииттэн иэйиилэрин уһугуннаран, өйдүү-саныы сылдьалларыгар умнуллубат кэрэ суолу-ииһи хааллардылар.
Марелла Баишева.
