Доруобуйа ‒ барыбыт баайа

Сайыммыт саҕаланан, айылҕабыт күөх солкоҕо сууланна. От-мас, сибэкки тыллыытын кытта үөн-көйүүр арааһа эмиэ тэҥинэн хойдор. Сайыҥҥы кэмҥэ айылҕаҕа сылдьан биитэр дьиэ да таһыгар от-мас баар буоллаҕына, клещтэн сэрэхтээх буоларбыт ирдэниллэр. Клещкэ ытыттарыы киһи доруобуйатыгар улахан охсууну аҕалыан сөп. Кинилэр энцефалит курдук ыарыыны тарҕатыахтааччыларынан биллэллэр.

Бэс ыйыгар үктэнэн баран улууспутугар номнуо 3 киһи: Өлөчөйгө, Майаҕа уонна Сыымахха икки улахан киһи, биир кыра оҕо клещкэ ытыттарыыларын түбэлтэлэрэ таҕыстылар. Өлөчөйгө ытырбыт клещ энцефалиттан ыраас буолара билиннэ, кэнники икки клещ анаалыһа чинчийиигэ сылдьар. Бу туһунан улуус баһылыгын бүгүҥҥү планеркатыгар Роскомнадзор улуустааҕы салаатын начаалынньыгын солбуйааччы Александра Тобонова иһитиннэрдэ.

Клещтэн көмүскэнэр миэрэлэринэн сэрэтэр уонна харыстанар быһыыны туруортарыы, тыаҕа тахсарга үөн-көйүүр киирбэт гына эккин сабар гына таҥныы, эти-сиини көрүнүү буолар.

Улуус кылаабынай бырааһа Алексей Павлов клещ утары быһыыны баҕалаах дьоҥҥо оҥороллорун, билигин вакцина баарын эттэ. Бүгүҥҥү күҥҥэ улуус үрдүнэн быһыыны 21 киһи, ол иһигэр 1 оҕо, оттон ревакцинацияны 37 киһи, ол иһигэр 18 оҕо ылбыт. Улууспут олохтоохторун клещтэн бэйэҕитин харыстанан быһыыны туруортараргытыгар сүбэлиибит. Оҕолорго клещтэн утары быһыыны оҥоруу 1 саастарыттан көҥүллэнэр. Өскөтүн эһиги клещкэ ытыттарбыккытын биллэххитинэ, ону бэйэҕит ыла, таһаара сатаабакка, балыыһаҕа тиийэн көмө ыларгыт булгуччулааҕын туһунан доруобуйа харыстабылын үлэһиттэрэ сүбэлииллэр.

@gazetaerkeii @ulusmedia