Бүгүн, от ыйын 5 күнүгэр, «Дьол түһүлгэтэ» уопсастыбаннай кииҥҥэ «Майа сэлиэнньэтэ» тыа сирин түөлбэтин Хоту Майатааҕы быыбардыыр уокуруктан дьокутаат Васианна Птицына олохтоохтору кытта тус көрсүһүүнү тэрийдэ.
Майа араас түөлбэлэриттэн 7 киһи кэлэн дьокутааттарыгар кыһалҕалаах боппуруостарын кэпсээн сүбэ-ама ыллылар.
Васианна Иннокентьевна кэлбит олохтоохтору кытта ирэ-хоро кэпсэтэн, баар кыһалҕаны хайдах, ханна быһаарсыахха сөбүн наардаан бэлиэтэннэ. Элбэх оҕолооҕунан Бачыым уулуссаҕа сир учаастагын ылбыт ыаллар ааттарыттан гаас ситимин тардыыны, суол тутуутун, сайыҥҥы уу ситимин тардыыны туруорустулар.
Сааскы хаар, сайыҥҥы ардах уута хонон тэлгэһэлэрэ ууга баран эрэйдэнэр бэтэрээннэр көмө көрдөһө кэлбиттэр.
Майа төрүт олохтооҕо бэтэрээннэр уопсайдарыгар куортамҥа олорор ыал элбэҕин, ирдэнэр бэрээдэги тутуспаттарын, олохтоохтор бэйэлэрэ даҕаны уопсай дьиэ олоҕор аанньа кыттыбаттарын, дьиэни-уоту харыстаабаттарын, алыс найыланалларын туһунан санаатын этиннэ. Дьон ортотугар сөптөөхтүк туттан олоруу бэрээдэгэр оҕону кыра сааһыттан үөрэтиини ыытар наадатын эттэ.
Үс этии уһаайбаҕа наадыйааччылартан киирдэ. Майаҕа ыччат дьон олохсуйуон баҕалааҕа киһини үөрдэр эрээри дьиэ-уот оҥосторго сир көстүбэтэ кыһалҕалаах боппуруос.
Тыа сирин түөлбэлэрин дьокутааттара олохтоох боппуруоһу миэстэтигэр уһаппакка-кэҥэппэккэ эрэ быһаарыыга үлэлэһэр боломуочуйаларын Васианна Птицына курдук ис сүрэхтэн ылсан үлэлииллэрэ быыбардааччылары үөрдэр, олохтоох былааска итэҕэли күүһүрдэр.
Евдокия Решетникова.