Майаҕа саха итэҕэлин тарҕатар “Сырдык Айыы сыдьаайа” түмсүү дьоно тохсунньу 12 күнүгэр балаҕаҥҥа мустан, үгэскэ кубулуйбут саҥа сыл уотун көмүлүөкпүтүгэр уматтыбыт.
Саргылаах саҥа үүммүт 2025 сылга баҕа санааларбыт олоххо киирэллэригэр, анал байыаннай дьайыы тохтоон, эйэлээх олохпут салҕанарыгар баҕаран туран аал уоппутун алаадьынан, туоһунан айах туттубут.
Бастакы уот оттуллар сиэрэ-туома оҥоһуллар бэлиэ күнүгэр Дьокуускайтан, Намтан тиийэ эдэр дьон ыалдьыттаатылар. Түмсүү дьоно сылбыт ыалдьыттардаах саҕаламмытыттан үөрдүлэр. Бары итии чэйдээх сандалы тула олорон ааспыт сылга туох ситиһиилэр кэлбиттэрин сэмэйдик үллэстэн, бириистээх оонньуулары оонньоон, дуоһуйа сынньанан, быйылгы сылга саҥалыы эрчим ылан тарҕастыбыт.
Иэйэхсит сыла хас биирдии дьиэ кэргэҥҥэ дьоллоох, нус-хас олоҕу аҕаллын.
Марелла Баишева.