Оҕо сайыҥҥы сынньалаҥа
Бэс ыйын 5‒25 күннэригэр «Чүүйэ» МУТ (салайааччы Аркадий Лукин) «Уодай» базатыгар агро хайыскалаах В.П.Ларионов аатынан Майа орто оскуолатын кытта дуогабар түһэрсэн, 7‒9 кылаас үөрэнээччилэригэр «Сайылык оҕолоро» ньирэй көрөр лааҕыр бастакы сезона үлэлээтэ.
1986 с. тутуллубут «Уодай» база 1990-с сыллардаахха ыһыллыы-тоҕуллуу бириэмэтигэр чөл туругун сүтэрбит. Кэлин Аркадий Лукин бэйэтин илиитигэр ылан саҥа тыыны киллэрбитэ. Базаны сөхсүтэн, күрүөлээн-хаһаалаан, саҥа дьиэ-уот тутан, электроуот киллэртэрэн, саҥардан оҥорбутун кэннэ сылгы көрөр-истэр базата буолбута.
«Чүүйэ» хаһаайыстыба ньирэйдэри сайылатар, мэччитэр сирэ суох буолан «Уодай» базатыгар аҕалбыттар. Итиннэ «Сайылык оҕолоро» лааҕыр үлэтин саҕалаабыта.
Улууска тыа хаһаайыстыбатын сылларыгар анаммыт «Сайылык оҕолоро» күнүскү лааҕыр В.П.Ларионов аатынан Майа орто оскуолатын 100 оҕолоох «АйСитим» лааҕыр биир хайысхата буолар. 25 иитиллээччилээх лааҕыр үлэтин оскуола социальнай педагога Розалия Сыромятникова салайда уонна базаҕа айаннарын оскуола оптуобуһа толору хааччыйда.
Оҕолор көрүүлэригэр-истиилэригэр 91 ньирэй баар: 31 ‒ олох кыра, 19 ортоку, 41 улахан ньирэйдэр. Сайылык оҕолоро бары биир сомоҕо буолан күн аайы ньирэйдэри күҥҥэ үстэ аһатан, барыларыгар аат биэрэн, сылдьар далларын ыраастаан кыһамньылаахтык үлэлээтилэр-хамсаатылар. Алаас уонна тыа айылҕатыгар сылдьан лааҕыры олус сөбүлээбиттэр, астыммыттар уонна эһиил өссө кэлэр санааламмыттар.
Иван Лукин.
