Олунньу 1 күнүттэн 10 күнүгэр диэри В.П.Ларионов аатынан Майа орто оскуолатыгар сахалартан бастакы академик Владимир Петрович Ларионовка аналлаах араас тэрээһиннэр ыытылла тураллар. Бүгүн, олунньу 5 күнүгэр, үгэскэ кубулуйбут «Володя Ларионов» галереятыгар киирбит туйгун үөрэнээччилэри чиэстээһин буолла. Владидир Петрович Ларионов оскуолаҕа куруутун туйгун сыанаҕа үөрэммитэ. 1956 сыллаахха Майа орто оскуолатын кыһыл көмүс мэтээлинэн бүтэрбитэ. Кини туйгун үөрэҕэ, билиигэ тардыһыыта биһиги оскуолабыт үөрэнээччилэригэр сулус курдук сыдьаайа сылдьар.
Бу үөрэх дьылыгар иккис чиэппэр түмүгүнэн 107 туйгун үөрэнээччи баар. Галереяҕа киирэр сүрүн ирдэбил туйгун үөрэх буолар. Иккис кылаастан уон биирис кылааска диэри үөрэнээччилэр сыл бастакы аҥаарынан уонна сыл түмүгүнэн киирэллэр. «Дабаан» научнай түмсүү салайааччыта туйгун үөрэхтээх оҕону кинигэҕэ киллэрэр.Олунньу 1 күнүттэн хаартыскалар истиэндэҕэ ыйаммыттара. Бу күн хас биирдии үөрэнээччи «Володя Ларионов» галереятыгар киирбитин туоһулаан туоһу сурук тутта.
