Майаҕа кулун тутар 9 күнүгэр “Дьол түһүлгэтэ” уопсастыбаннай кииҥҥэ үгэскэ кубулуйбут “Сааскы баал” кэрэ бырааһынньыга буолла. Сааскы маҥнайгы тэрээһиҥҥэ араас кэрэ сибэккилээх былааччыйалаах мааны далбар хотуттар суугунаһа хаамтылар, сэгэлдьиһэ сиэттистилэр.
Саалаҕа күүстээх аҥаардар тоҕуоруһан кэлбиттэрэ ураты эйгэни үөскэттэ. Бу күн эрдэ биллэриллибитинэн, дьахталларга таҥас-сап 3 көрүҥэр куонкурустар ыытылыннылар. Манна араас сыллар уоттаах-күөстээх муусукаларынан үҥкүү быыһыгар ретро муодаҕа, аныгы уонна сибэккилээх былааччыйаҕа куонкурустар ыытылыннылар. Анатолий Чичахов, Степан Билюкин, Инна Николаева, Марелла Баишева дьүүллүүр сүбэҕэ үлэлээн тириттилэр-хоруттулар. Кинилэр “Куонкурус кыттыылаахтара бары кэрэлэр, онон таларга уустук соҕус буолла эрээри, куонкурус аата куонкурус” диэн бэйэлэрэ тиктибит көрүөхтэн кэрэ былааччыйаларынан кыайыылаахтары таллылар.
“Ретроҕа” 1-кы миэстэ Светлана Охлопкова, 2-с миэстэ Марфа Алексеева, 3-с миэстэ Антонина Петрова буолан үрүҥ көмүс киэргэллэринэн наҕараадаланнылар. “Аныгы кэрэ былааччыйаҕа” 1-кы миэстэни Надежда Павлова, 2-с миэстэни Матрена Харитонова, 3-с миэстэни Людмила Заровняева, “Сиэдэрэй сибэкилээх былааччыйаҕа” Александра Рожина 1-кы, Заредина Сосина 2-с, Розалия Колосова 3-с миэстэлэри ылан бириистэринэн бэлиэтэннилэр.
Кэрэ аҥардарга сыһыаннаах биктэриинэни Майатааҕы М.И.Брызгалова аатынан оҕо бибилэтиэкэтин үлэһиттэрэ бэлэмнээбит ыйытыктарынан Антонина Петрова оонньотто. Манна биллиилээх кэрэ аҥардар устуоруйаларын саамай үчүгэйдик билээччинэн Татьяна Колосова тахсан, бириис тутан үөрдэ-көттө. Бу күн төрөөбүт күннээх Светлана Охлопковаҕа түмэннэр сэмэй бэлэхтэрин туттардылар.
Сааскы маҥнайгы тэрээһиҥҥэ суруйааччы Инна Николаева-Угинка бэйэтин хоһооннорунан, Анатолий Чичахов, Роман Денисов сэрии сылын оҕолоругар, кэрэ аҥаардарга аналлаах хоһооннорунан, Нина Крылова ырыанан, Егор Гаврильев хормуоскаҕа оонньоон эҕэрдэлэрин тиэртилэр. Педагогическай үлэ бэтэрээннэрэ Горнай Бэрдьигэстээҕиттэн Елизавета Слепцова, Дьокуускайтан английскай тыл учуутала Наталья Баишева ыалдьыттаан тэрээһини ырыаларынан-тойуктарынан киэргэттилэр. Тэрээһин кыттыылаахтара фигурнай вальс, твист, рок-н-ролл, “Дорожка”, “Балыктаах киэһэтэ” ырыанан флешмоб үҥкүүлээн дуоһуйа сынньаннылар.
Биһиги аҕам саастаах көлүөнэбит үлэҕэ буоллун, успуорка буоллун, сынньалаҥҥа буоллун – барытыгар инники сылдьар, көхтөөх, кыахтаах, дууһалыын эдэр, эрчимнээх.
“Түмэн” уопсастыбаннай холбоһук уочараттаах тэрээһинин Майатааҕы Үһүс көлүөнэ оскуолата, “Кийииттэр” уонна “Кыталык” бэтэрээннэрин “ОБТ” үҥкүүтүн түмсүүлэрэ тэрийэн сааскы сэргэхсийиини, ыраас, үтүө санааны бэлэхтээн, ис турукпутун байыттылар.
Марелла Баишева.
