Ульяна Шишигина, Мэҥэ Хаҥаластааҕы саахымат федерациятын чилиэнэ, саахыматчыт.
Сэрии, үлэ бэтэрээнэ, норуодунай судьуйа Михаил Михайлович Сотников төрөөбүтэ 100 сылыгар аналлаах дэкээдэ буолан ааста.
Михаил Михайлович тустаах үлэтин таһынан киэҥ өрүттээх уопсастыбаннай үлэнэн дьарыктанара, ол курдук, бэтэрээннэр сэбиэттэрин тэрийэн салайбыта, саахымат успуордун уонна ат сүүрдүүтүн федерациятын бэрэссэдээтэлэ этэ. Михаил Михайловичка аналлаах дэкээдэ ахсынньы 21 күнүгэр саахымат күрэхтэһиитинэн түмүктэннэ. Балаһыанньа эрдэттэн бигэргэтиллэн, улууспут араас муннуктарыттан Павловкайтан, Төхтүртэн, Мэлдьэхситтэн, Хараттан, Чууйэттэн, Төҥүлүттэн, Өлөчөйтөн, Балыктаахтан, Аллараа Бэстээхтэн, Майаттан 53 кыттааччылаах олус сэргэх саахымат мемориал-турнира буолан ааста. Бары бииргэ швейцарскай системанан 9 туру оонньоотубут.
Аан бастаан Михаил Михайлович өйдөбүнньүк турнира 1995 сыллаахха Кыайыы 50 сылыгар түбэһиннэрэн, кини үлэлиир кэмигэр туттарбыт, суут дьиэтигэр ыытыллыбыта. Кини саахымакка бэркэ оонньуура, олус таптыыра, саахымат сайдыытыгар сүҥкэн кылаатын киллэрбитэ диэтэххэ ыыстарбаппыт буолуо. Оччолорго саахымат федерациятыттан мемориал-күрэхтэһии туһунан этии киллэрбиппитин уола Александр Михайлович өйөөн, көмөлөһөн 5-тии сыл буола-буола ыытарга былааннанан, олоххо киллэрэн кэллибит. Бу сыллар тухары, билигин отставкаҕа олорор Үрдүкү суут бэтэрээн судьуйата Александр Михайлович успуонсардаан, суут-сокуон тэрилтэтэ, улууспут успуордун кэмитиэтэ, биирдиилээн аҕа саастаах саахыматчыттар өйөөһүннэринэн күрэхтэһиибит ис хоһооно байытыллан, улууспут патриота Михаил Михайлович аата умнуллубат, үйэтиллэн эдэр көлүөнэҕэ тиэрдиллэ турар.
Дьахталларга 50 саастарыгар диэри бастакы Айта Ильина (Майа), иккис Зинаида Данилова (Табаҕа), үһүс Аграфена Брызгалова (Чүүйэ), 50–65 саастаахтарга бастакы Ольга Иванова (Мэлдьэхси), иккис Матрена Аржакова (Таатта), үһүс Любовь Попова (Өлөчөй), 65 үөһэ саастаахтарга бастакы Раиса Петрова, иккис Ульяна Шишигина (Майа), Светлана Ильина (Хорообут) буоллулар.
Эр дьоҥҥо 55 саастарыгар диэри бастакы Михаил Куприянов (Майа), иккис Гаврил Колосов, үһүс Василий Эверстов (Майа), 55–70 саастаахтарга бастакы Павел Цыпандин (Майа), иккис Егор Михайлов (Хара), үһүс Милентий Каплин (Төҥүлү), 70-тан үөһэ саастаахтарга бастакы Дмитрий Ченянов (Төҥүлү), иккис Николай Никифоров (Төҥүлү), үһүс Николай Климентов (Майа) миэстэни ыллылар.
Күрэхтэһиибитигэр анал бириистэри үөрүүлээх түмүккэ туттардыбыт. Саамай аҕа саастаах кыттааччы, уонна күрэхтэһиибит кылаабынай судьуйатыгар Дмитрий Сыромятниковка, эдэр ыччаттарга биир бастыҥ саахыматчыкка тимир суол машиниһыгар Николай Сидоровка, саамай эдэр кыттааччыга В.П.Ларионов аатынан оскуола 4 кылааһын үөрэнээччитигэр Олег Шахурдиҥҥа, үөрэнээччилэртэн бастыҥ көрдөрүүлээх Харатааҕы лиссиэйтэн Юра Гагариҥҥа ананна. Бэйэлэрин кэмнэригэр чиэстээхтик үлэлээбит, үйэлээҕи, сайдыыны уһансыбыт дьоммут ааттара-суоллара сүппэтигэр ахтан-санаан ааһар хайаан да наада.
