Итинник бэйэтин этиитигэр тоһоҕолоон бэлиэтээтэ бүгүн, олунньу 13 күнүгэр, Хаатылыма бөһүөлэгин олохтоохторугар туһаайан СӨ ситэриилээх былааһын ааспыт сыллааҕы үлэтин отчуоттуур мунньаҕар бөлөх салайааччыта СӨ Экэниэмикэҕэ миниистирэ, Бырабыыталыстыбаҕа биһиги улууспут кураатара Петр Попов.
‒ Нэһилиэнньэтин ахсаанынан кыра нэһилиэктэргэ сылдьан үгүстүк бэлиэтии көрдөххө, манна дьон-сэргэ «эһиннибит-быһынныбыт, куһаҕаннык олоробут» ‒ диэн хаһан да «ытаммакка» инники сайдыыны көрөн элбэх этиилэрдээх, көрүүлэрдээх буоларгытыгар махталбын тиэрдэбин. Биһиги үлэлии сылдьар дьоҥҥо ити улахан күүс-көмө, инники үлэбитигэр бигэ тирэх буолар, ‒ диэтэ Петр Иванович.
Отчуоттуур бөлөх састаабыгар СӨ Бырамыысыланнаска уонна геологияҕа министиэристибэтин Бырамыысыланнаска департаменын салайааччытын солбуйааччы эбээһинэһин толорооччу Анатолий Захаров, СӨ ДьУоКХ уонна энергиэтикэҕэ министиэристибэтин Экэниэмикэҕэ, үпкэ, баайга-дуолга уонна информатизацияҕа департаменын салайааччыта Наталья Петрова, СӨ «Уу хаһаайыстыбатыгар уонна халаан уутун содулун туоратыыны тэрийэр уонна чөлүгэр түһэрэр үлэҕэ толоруулаах дириэксийэ» судаарыстыбаннай хааһына тэрилтэтин дириэктэрэ Николай Соловьев, СӨ Инновацияҕа, сыыппаранан сайдыыга уонна инфокоммуникационнай технологияларга министиэристибэ сибээс эйгэтигэр судаарыстыбаннай бэлиитикэтин отделын салайааччыта Евгений Апросимов үлэлээтилэр.
Хаатылымалар, атын да сирдэргэ курдук, уматык сыаната үүнэ-тэһиинэ суох үрдүү турарыгар хонтуруол олохтонорун, ходуһаларыгар оттообот дьон сирдэрин туһаҕа таһаарыыга дьаһал ылынылларыгар, «КлиКра» сокуонун тула туох үлэ барарын, экологияҕа, айылҕабыт харыстабылыгар бырамыысыланнас таһаарар хоромньутугар бэрэбиэркэ күүһүрэригэр, суотабай сибээс киириитин, нэһилиэк сиригэр-уотугар үлэ миэстэтин таһааран нэһилиэнньэ ахсаанын элбэтии ситиһиллэригэр бэлэм скважинаны туһанан, ыраас салгыннаах, кэрэ айылҕалаах сиргэ дьону эмтиир, доруобуйаларын чөлүгэр түһэрэр киин эбэтэр атын да социальнай эбийиэк, ону таһынан дьоҕус да буоллар, саҥа оскуола тутууларын туруорустулар. Итини сэргэ олохтоохтор аҕыйах ахсааннаах оҕолоох оскуолалар инники дьылҕаларыгар өйөбүл оҥоһулларыгар, оскуола учебниктарын бэлэмнээн таһаарыыга, чуолаан саха тылыгар, литературатыгар үөрэтиигэ биир систиэмэлээхтик, бары ирдэбиллэргэ эппиэттэһэллэрин ситиһэргэ, быстах байыаннай дьайыыга сылдьар буойуттарга, кинилэр дьиэ кэргэннэригэр көрүллэр чэпчэтиилэр өрүс тырааныспарыгар, Дьокуускайга автобуска сырыыга көрүллэллэригэр баҕа санааларын эттилэр.
Отчуот мунньаҕар оройуон Сэбиэтин дьокутаата Мэхээс Масаха кыттан сүөһү иитиитигэр бастакы хардыыларын итиэннэ бу салааны салгыы барыстаах оҥорорго бэйэтин инники былаанын саас-сааһынан чопчу сыыппараларга олоҕуран билиһиннэрдэ. Экэниэмикэ миниистирэ Петр Попов, нэһилиэк олохтоохторо Валентина Дмитриева, Михаил Афанасьев тыа хаһаайыстыбатын сайыннарыыга ирэ-хоро ылсан үлэтин тэтимнээхтик, хорутуулаахтык саҕалаан эрэриттэн астынан туран, эдэр дьон тыа сиригэр олохсуйан өбүгэ дьарыгын тэнитиигэ үтүө холобур буоларын бэлиэтээтилэр. Мэхээс Хаатылымаҕа сир-уот ылан хаһаайыстыбатын хаҥатар соруктааҕын мустубут дьон үөрэ иһиттилэр.
Отчуот мунньаҕар 17 киһи кыттан бары кэриэтэ ыйытыы биэрэн, этиилэрин киллэрэн, этэргэ дылы, атах тэпсэн олорон, өрөспүүбүлүкэ салалтата, Бырабыыталыстыбата ыытар үлэтин биир санаанан өйөөн тарҕастылар.
Мунньах кэннэ отчуоттуур бөлөх салайааччыта Петр Попов, улуус баһылыга Дмитрий Тихонов, нэһилиэк баһылыга Айсен Спиридонов, оройуон Сэбиэтин дьокутаата Масаха Мэхээс нэһилиэк, улуус Бочуоттаах гражданиныгар, тыыл, үлэ бэтэрээнигэр, Дьоруой-ийэҕэ Варвара Афанасьеваҕа дьиэтигэр тиийэн РФ Бэрэсидьиэнэ Владимир Путин аатыттан Улуу Кыайыы 80 сылынан үбүлүөйдээх мэтээли туттардылар, чэгиэн доруобуйаны, этэҥҥэ буолууну баҕардылар.
Алена Докторова
