Олунньу 14 күнүн иккис аҥарыгар Саха Өрөспүүбүлүкэтин бырабыыталыстыбатын 2023 сыллаах үлэтин отчуота Нөөрүктээйи нэһилиэгэр буолла. Бастакы бөлөҕү өрөспүүбүлүкэ экэниэмикэтин миниистирэ, улуус кураатара Петр Попов салайан илдьэ сылдьар. Улуус баһылыга Дмитрий Тихонов, управлениелар салайааччылара арыаллаатылар. Дмитрий Тихонов отчуот бөлөҕүн билиһиннэрдэ, мунньаҕы нэһилиэк баһылыга Николай Федоров салайда.
Олохтоохтор 69 киһи миниистир Петр Иванович ааспыт сылга ыытыллыбыт үлэни хайысхаларынан сиһилии сырдатар дакылаатын иһиттилэр.
Людмила Оконешникова, Гаврил Осипов, Руслан Кычкин, ону сэргэ, мунаарар боппуруостарын элбэх киһи суругунан ыйыттылар.
Өлүөнэ өрүһү туоруур муоста тутулуннаҕына өрүскэ уларыйыы баар буолуо дуо, кэпэрэтиип кыаллыа дуо, “Ыраас уу” бырагыраамаҕа тоҕо киирбэппитий, скважина тоҕо оҥоһуллубат, водохранилище оҥорорго көмө наадатын, кыра кыамталаах атомнай ыстаансыйа оҥоһуллуо дуо, уот лииньийэтэ эргэрбитин, сип хаабыл хаһан холбонорун, тыа хаһаайыстыбатыгар үлэлиир дьоҥҥо дьиэ тутарга кубуота баар дуо, хаарбах дьиэни көрөр хамыыһыйа хаһан кэлэрин, Аллараа Бэстээх – Майа суолун быһа охсуһуутугар светофор туруорулларыгар, нэһилиэктэн федеральнай суолга тахсар кэрчиги аспааллааһыҥҥа, “Хаарбах дьиэттэн көһөрүү” бырагыраама чааһынай дьиэлээхтэргэ үлэлиэ дуо, мини-футбол федерациятын ким салайарый, о.д.а. ыйытыктары туруордулар, этиилэри оҥордулар. Туһааннаах салайааччылар киирбит бары ыйытыктарга толору хоруйдары биэрэннэр олохтоохтору астыннардылар. Даамба тутуутугар национальнай бырайыагынан харчы көрүллэрин, онно үлэлэһэллэригэр экэниэмикэ департаменын салайааччы Наталья Петрова, кэлбит ууну аһарар, сөптөөх ууну тутан хаалар автоводосброс тутуу наадатын уу хаһаайыстыбатын уонна халаан содулун чөлүгэр түһэрэр дириэксийэ салайааччыта Гаврил Слободчиков быһааран сүбэлээтилэр.
“Лена” оҕо уһуйаанын сэбиэдиссэйэ Маргарита Шарина Кушнарев атыыһыт дьиэтэ оҕо уһуйаана буолан билиҥҥэ диэри үлэлии турарын пристрой тутан толору хааччыллыыны киллэрбитигэр Дмитрий Ивановичка махтанна итиэннэ нэһилиэнньэ ахсаана эбиллэ турарынан саҥа уһуйаан тутуутун уочаратын чугаһатарга көрдөстө.
Түмүккэ миниистир Петр Иванович отчуокка кэлбит олохтоохторго махтанна уонна үлэ дьонун бэлиэтээн Үөрэҕирии министиэристибэтин Бочуоттаах грамотатын «Мичээр» уһуйаан успуорт инструкторыгар Александр Саввиҥҥа үөрүүлээх быһыыга-майгыга туттарда.
Отчуоту 69 киһи иһиттэ.
Марелла БАИШЕВА.
